Европа давлатлари АҚШнинг Ғазо бўйича тинчлик режасини олқишлади

Франция президенти Эммануэл Макрон Ғазо секторида Исроил ва ҲАМАС ўртасидаги урушни тугатиш бўйича АҚШ президенти Доналд Трамп илгари сурган режани қўллаб-қувватлади. «Президент Трампнинг Ғазодаги урушни тўхтатиш ва барча гаровга олинганларни озод қилиш мажбуриятини олқишлайман», — деб ёзди у 29 сентябр, душанба куни кечқурун X ижтимоий платформасида.

Макрон Исроилдан ушбу режа асосида «қатъий ҳаракат қилишини» кутмоқда, ҲАМАС эса барча гаровдагиларни дарҳол озод қилишдан бошқа «иложи» қолмайди. Париж можарони ҳал қилишга ҳисса қўшишга ва режа шартларини ҳар икки томон бажаришини назорат қилишга тайёр, дея қўшимча қилди Франция президенти.

Британия бош вазири Кир Стармер ҳам Трампнинг режасини қўллаб-қувватлашини билдирди. «АҚШнинг Ғазодаги урушни тугатиш бўйича янги ташаббуси жуда мамнуният билан қабул қилинади ва мен президент Трампдан миннатдорман. Биз унинг жангларни тўхтатиш, гаровга олинганларни озод қилиш ва Ғазо халқига зудлик билан инсонпарварлик ёрдамини таъминлаш борасидаги саъй-ҳаракатларини қаттиқ қўллаб-қувватлаймиз», деди Британия бош вазири.

Стармер барча томонларни бирлашишга ва келишувни якунлаш, уни амалга ошириш учун АҚШ маъмурияти билан ҳамкорлик қилишга чақирди. «ҲАМАС энди режага рози бўлиши ва азоб-уқубатларга чек қўйиши, қуролларини ташлаб, қолган барча гаровга олинганларни озод қилиши керак», деди у.