Уйғонгандан кейин икки соат ичида нонушта қилиш фойдали экани аниқланди

Кеч нонушта қилиш соғлиқнинг ёмонлашиши ва умр кўриш давомийлигининг қисқариши билан боғлиқ. Яқинда олимлар айнан шундай хулосага келди.

Фото: Getty images

Олимлар узоқроқ умр кўриш учун уйғонгандан кейин икки соат давомида нонушта қилиш кераклигини аниқлади.

Янги тадқиқотда Буюк Британиядан 2945 нафар кекса киши иштирок этди. Улардан кечроқ нонушта қилганларида бевақт ўлим хавфи юқори бўлган. Ҳар бир кечиктирилган соат бу хавфни 8-11 фоизга оширди.

Шу билан бирга, эрталабки овқатланиш вақти ва одамларнинг умр кўриш давомийлиги ўртасидаги боғлиқликни тушуниш учун қўшимча тадқиқотлар ўтказиш керак.

Овқатланиш бўйича кўплаб мутахассислар, шунга қарамай, эрталаб уйғонгандан кейин бир-икки соат ичида нонушта қилишни маслаҳат беради.

Бу кўпчиликка соғлом овқатланишга ва метаболик мувозанатни яхшилашга ёрдамлашади. Бундай овқатланиш қондаги глюкоза даражасини барқарорлаштиради, метаболизмни фаоллаштиради, овқатланишни циркад ритмга мослаштиришга ёрдам беради.

Тадқиқотлар шуни кўрсатдики, эрта нонушта қондаги қанд миқдорини яхшилайди ва овқатдан кейин глюкагонга ўхшаш пептид-1 (ГПП-1) реакциясини кучайтиради.

Тайёрлаган: Сардор Юсупов

#саломатлик #овқатланиш #Тиббиёт