Қирғизистонда пойтахтни кўчириш ҳақида гапирилди

Қирғизистонда айрим сиёсатчилар пойтахтни Бишкекдан Манас шаҳрига кўчириш ҳақида гапиришни бошлади. Бу ҳақда Миллий хавфсизлик давлат қўмитаси раҳбари, Вазирлар Маҳкамаси раиси ўринбосари Қамчибек Ташиев маълум қилди.

«Шунга лойиқ бўлсак, нега лойиқ бўлмас эканмиз, Худо хоҳласа, бўлади. Бунинг учун шаҳарни, халқни тайёрлаш, руҳий жиҳатдан бунга тайёр бўлиш керак. Пойтахт бўлиш осон эмас. Шаҳарга кўп маблағ ажратилмоқда, уни ўзгартириш керак. Ўзингиз кўриб турибсиз, ҳамма жойда қурилиш ишлари кетяпти. Уни замонавий шаҳарга айлантириш керак», деди Ташиев 11 октябр куни Манас мактаблари директорлари билан учрашувда.

Унинг сўзларига кўра, Манас республика аҳамиятига молик учинчи шаҳар бўлади. Бу 2026 йилда содир бўлади.

Ташиев, шунингдек, шаҳар номини ўзгартириш стратегик жиҳатдан тўғри қарор бўлганини таъкидлади.

Жалолобод шаҳри 17 сентябр куни расман Манас деб ўзгартирилди. Президент Садир Жапаров тегишли қонунни имзолади.

Манас - Қирғизистондаги учинчи йирик шаҳар, Жалолобод вилоятининг маъмурий маркази. Аҳолиси 184,4 минг киши. Мамлакат жанубида, Фарғона водийсида жойлашган.