Рубио Трампни санкциялар зарурлигига ва Путиннинг ён бермаслигига ишонтирди – ОАВ

Оқ уйнинг Россияга нисбатан тактикасининг кескин ўзгаришига давлат котиби Марко Рубио сабаб бўлди, деб ёзди Bloomberg.

Рубио Москва ўз позициясини ўзгартирмаган деган хулосага келди, у Россияга нисбатан қатъий чораларнинг узоқ йиллик тарафдори ҳисобланади.

Бу ҳақда агентликка вазиятдан хабардор бўлган АҚШ ва Европа расмийлари маълум қилди. Таъкидланишича, Рубио Россия ТИВ раҳбари Сергей Лавров билан телефон орқали мулоқот қилди ва Кремль ўт очишни тўхтатиш бўйича музокараларни яна чўзишга уринаётганини англади. Шундан кейин у билан юзма-юз учрашишдан воз кечди.

АҚШ президенти Доналд Трамп, ўз навбатида, шу ҳафта Будапештда Владимир Путин билан яқин ҳафталарга режалаштирилган саммитни бекор қилди ва иккинчи президентлик муддатида Россияга қарши биринчи санкцияларни жорий қилди. Унинг сўзларига кўра, бундай чораларнинг «вақти келди».

Трамп Овал кабинетда журналистларга шундай деди: «Ҳар сафар Владимир билан суҳбатлашганимда, биз яхши мулоқот қиламиз, лекин улар шунчаки ҳеч нарсага олиб келмайди».

Хабар қилинишича, Россия АҚШга Украина учун тинчлик шартлари режасини юборган, у Москванинг барча маълум позицияларини такрорлаган, жумладан, Россия Қуролли кучлари ҳозир босиб олганидан кўра кўпроқ ҳудудларни бериш талабларини ҳам ўз ичига олган.

Россия расмийлари ўтган ҳафта Путин ва Трампнинг қўнғироғидан сўнг, Америка президенти Украинанинг бошқа ҳудудларида Москванинг ўта камтарона ҳудудий ён бериши эвазига Россиянинг Донбасс ҳудудининг қолган қисмини топшириш талабига рози бўлди, деб ўйлаган эди. Бироқ, Володимир Зеленский билан учрашувдан бир кун ўтиб, Трамп ҳозирги фронт чизиғида ўт очишни тўхтатишни истаётганини такрорлади, буни Москва Аляскадаги саммит олдидан рад этган эди.

Қайд этилишича, Рубио Москва билан кейинги мулоқотлар, жумладан, бўлажак учрашувлар учун имконият қолдирган. Журналистлар олдида чиқиш қилар экан, у АҚШ «агар тинчликка эришиш имконияти бўлса, доимо ҳамкорлик қилишдан манфаатдор бўлишини» айтди. «Президент сўнгги бир неча ой ичида агар биз тинчлик келишувига эришмасак, қачондир нимадир қилишга мажбур бўлишини бир неча бор айтган. Бугун у шундай қилди», деди Рубио.

22 октябрь куни Трамп маъмурияти Россиянинг энг йирик нефть компанияларига қарши санкциялар киритиб, давлатнинг «Роснефть» ва «Лукойл» компанияларини қора рўйхатга киритди.