Трамп наркокартелларга қарши курашиш учун Мексикага қўшин киритмоқчи – ОАВ

АҚШ президенти Доналд Трамп маъмурияти наркокартелларга қарши курашиш учун Мексикага Америка қўшинларини юбориш бўйича ҳарбий миссияни батафсил режалаштиришни бошлади. Бу ҳақда NBC News нашрига вазиятдан хабардор бўлган амалдорлар маълум қилди.

Қайд қилинишича, Мексика ҳудудида қуруқликдаги операцияларни ўз ичига олган эҳтимолий миссияга тайёргарликнинг дастлабки босқичи аллақачон олиб борилмоқда. Шу билан бирга, манбаларнинг таъкидлашича, қўшинларнинг жойлаштирилиши муқаррар эмас - операция кўламини муҳокама қилиш давом этмоқда ва якуний қарор ҳали қабул қилинмаган.

Операцияга АҚШ разведкаси раҳбарлигида ҳаракат қиладиган Бирлашган махсус операциялар қўмондонлиги ҳарбий хизматчилари жалб қилиниши мумкин. Нарколабораториялар, шунингдек, наркокартел аъзолари ва етакчиларига зарба бериш учун дронлардан фойдаланиш асосий вазифа бўлади.

NBC таъкидлаганидек, бундай миссия картелларга қарши тўғридан-тўғри ҳаракат қилмасдан, маҳаллий куч тузилмаларини қўллаб-қувватлаш билан чекланган АҚШ аввалги маъмуриятлари сиёсатидан ажралган бўларди. Расмийларнинг таъкидлашича, операция маъқулланган тақдирда, маъмурият уни сир сақлашни режалаштирмоқда.

Ҳозир Трамп маъмурияти Мексикадаги эҳтимолий ҳарбий аралашув даражасини муҳокама қилишда давом этмоқда. Манбаларнинг таъкидлашича, Венесуэладан фарқли ўлароқ, режалаштирилган миссия мамлакат ҳукуматини ағдаришга қаратилган эмас. Шунингдек, уларнинг сўзларига кўра, Оқ уй ҳаракатларни Мексика расмийлари билан мувофиқлаштиришни афзал кўради, бироқ бундай мувофиқлаштиришсиз операциялар ўтказиш имкониятини истисно этмайди.

Февраль ойида АҚШ Давлат департаменти Мексиканинг олтита наркокартелини хорижий террорчилик ташкилотлари рўйхатига киритди, бу эса Америка разведка агентликлари ва ҳарбийларига жиноий тармоқларга қарши операциялар ўтказиш учун кенг ваколатлар берди, дея таъкидлайди NBC.

Параллел равишда Трамп Венесуэла қирғоқлари яқинида наркотрафикка қарши ҳарбий операцияни давом эттирмоқда. Сентябрь ойи бошидан бери Пентагон Кариб денгизи ва Тинч океанидаги 16 та кемага зарба берди, натижада, АҚШ ҳарбийлари маълумотига кўра, 64 киши ҳалок бўлган. Маъмуриятнинг Венесуэлага эътибори АҚШ гиёҳванд моддалар картели аъзоси сифатида айбланаётган президент Николас Мадурога босим ўтказиш кампаниясини ҳам ўз ичига олади. Сентябрь ойи бошида АҚШ мудофаа вазири Пит Ҳегсет Вашингтон Мадуро режимини ағдариш вариантини кўриб чиқишга тайёрлигини айтганди.