Купянскдаги қотиллик: оқ байроқ кўтарган қариялар ва ит ваҳшийларча ўлдирилди

Бугун Россия ва Украина ўртасидаги урушда содир бўлган даҳшатли воқеа ҳақида гаплашамиз. Уруш бошланганига тўрт йил бўлди, мен бу вақт давомида минглаб даҳшатли видеоларни кўришга мажбур бўлдим. Уруш ҳақида шунчалик кўп ёздикки, фронт ҳудудлари ёд бўлиб кетди. Ҳар сафар урушнинг юракни эзадиган кадрларини кўрганда, бундан ёмони бўлмаса керак деб ўйлардим. Лекин яқинда Украинанинг Купянск шаҳрида содир этилган қотилликдан ҳамон ўзимга келолмаяпман...

{Yii::t(}

Ўтказиб юбориш 6s

Ўтказиб юбориш

Тинчроқ жойга қочиш умидида оқ байроқ кўтариб кетаётган икки қария совуққонлик билан, фақат инсон деган ваҳший жонзотнинг қўлидан келадиган жирканчлик билан ўлдирилди. Уларнинг ёнида кетаётган оппоқ, беозор, забонсиз кучукча ҳам узоқ вақт жон азобида типирчилаб ўлиб қолди. Қариялар тирик қолиш умидида Яратганга дуо қилиб тинмай чўқинаётганини кўргач ҳам дрон операторлари қотиллик қилиш фикридан қайтмади.

Нима бўлган ўзи?

Воқеа Украинанинг Харкив областида жойлашган Купянск шаҳри яқинида содир бўлган. Иккита дрондан видеога олинган кадрда икки қария ёнма-ён кетаётгани, уларнинг бири оқ байроқ кўтариб олганини кўриш мумкин. Ҳозир дронлар фронт чизиғи яқинидаги ҳудудларни жаҳаннамга айлантирган, одам бемалол кўчада юра олмайди. Шу сабаб мустақил эвакуация бўлаётган одам қўлига оқ байроқ кўтариб олиши керак, бу қуролсизман дегани, бундай одамни ўлдириш уруш қонунларига зид, ҳарбий жиноят!

Қариялардан бири ёнидаги оппоқ кучукчаси билан сал илдамлаганида уларнинг яқинида ажалвор FPV-дрон пайдо бўлади. Бу арзонгаров дронларга ўқдори ёпиштирилган, олдида go pro'га ўхшаган камераси бўлади ва оператор камера орқали одамнинг ёши, бўйи, ҳарбий ёки ҳарбий эмаслигини бемалол кўра олади. Бундай дронлардан ҳар икки томон душман ҳарбийлари ва техникасини йўқ қилиш учун фойдаланмоқда.

Видеодаги қариялардан бирининг ёнига дрон учиб келади ва гўёки уни хавфсиз томонга бошлаётгандек йўл бўйлаб учади. Қария йўл юраркан тинмай чўқингани ҳолатни тасвирга олаётган тепадаги бошқа дрон тасвирида ҳам яққол кўринган. Оқ байроқ кўтарган қария секин кетаётганда дрон бирдан унга урилиб портлаб кетади. Қария жойида ўлади, унинг ёнидаги кучукча эса жон азобида типирчилаб, бир пасдан кейин у ҳам ўлади...

Кейин яна бир дрон учиб келиб чўқинаётган иккинчи қарияни ўлдиради. Бу ҳолатнинг барчаси тепароқдаги иккита дрондан видеога олиб турилган.

Ким айбдор?

Видеони биринчи бўлиб «Операция Z: военкори русской весни» деган русча ҳарбий канал эълон қилди. Унда қарияларни «украин ҳарбийлари ўлдиргани» айтилади. Кейинроқ бу видео украин каналларида ҳам тарқалиб, унда «қарияларни руслар ўлдириб Украина томонига ағдаришга урингани» айтилди. Украина армияси 77-аэромобил бригадаси «бу ишни руслар қилгани» ҳақида баёнот берди. Кўп ўтмай Украина бош прокуратураси баёнот бериб, ҳолат бўйича ҳарбий жиноят айблови билан иш очилганини маълум қилди.

Россияда жуда кўп блогерлар видеони Украина томони қилган деб тарқатди, ҳатто мамлакатдаги асосий давлат ахборот агентлиги «РИA-Новости»да ҳам шундай айблов чиқди. Бироқ Россия расмий идоралари ҳолатга муносабат билдирмади.

Ҳолат биринчи бўлиб русча Z-каналда чиққани украинлар эътиборини тортди. Уларнинг фикрича, видео биринчи русча каналда чиққанига қараганда, барчасини рус дронлари видеога олган. Рус дронларида пастдаги дронлар одамлари ўлдиришига қаршилик қилиш учун етарлича вақт бўлган. Воқеа содир ўлган ҳудуд ҳақида ҳам томонлар икки хил маълумот берган: руслар ҳолат Киев назорат қилаётган ҳудудда бўлган дейишмоқда, украинлар тескариси.

Уруш шунга арзирмиди?

Ким айбдор экани ҳақида исталганча тортишиш мумкин. Aсосий айбдор эса аниқ: уруш. Бу қотилликни қайси лаънати ҳарбий содир этган бўлса ҳам, уни уруш мана шундай ваҳшийга айлантирди. Икки славян давлат шунчалик душманга айландики, энди улар бир-бирини кўрган жойида ўлдирадиган ҳолатга етди. Нафрат ақл бовар қилмас даражага чиқди. Энди бу икки миллат қачондир яна дўстлашиб кетишига ишониш қийин. Сизга шу керак эдими, икки қарич ер учун уруш бошлаган жаноблар?

Ўткир Жалолхонов тайёрлади
Тасвирчи ва монтаж устаси — Фахриддин Ҳотамов