“Она учун ясалган печка” – мигрантликдан печкачиликкача

Ҳаво ҳарорати сезиларли пастлаши билан кўпчилик уй иситиш тараддудига тушиб қолди. Табиий газ етиб бормаган ҳудудларда одамлар тежамкор, энг асосийси хавфсиз печкаларни излашга тушган. Фарғонанинг Қўштепа туманидан бўлган Лазизбек Абдуҳатов астма касалига чалинган онасига тутун чиқармайдиган печка ясаб бериш учун астойдил бел боғлаган ва бунинг уддасидан чиққан. Россияда муҳожирликда юрган печкачи қишлоққа қайтади ва ўзи ихтиро қилган антиқа печкаси сабаб довруқ қозонди. У ясаган печкалар юртимиздан ташқари қўшни республикаларга ҳам сотиляпти.

{Yii::t(}

Ўтказиб юбориш 6s

Ўтказиб юбориш

Лазизбек ўзи ихтиро қилган печка ҳақида сўзлаб берди:

“Қишлоқчилик, совуқ тушганидан кейин амаллаб исиниш керак. Онамнинг кўмирга аллергияси бор. Уйдаги печкалар эса тутаб кетарди. Шунда опилка ёқа бошладик. Опилка эрталабга яқин ўчиб қолаётгани учун кўмир печкага ўзгартирмоқчи бўлдим. Опилка печкани ўзим ясаган эдим. Шунда хаёлимга бир фикр келди. Тутунга аллергиямиз бор, кўмирга ёнадиган, тутамайдиган печка ўйлаб топсаммикин.... Бунинг устида ишлашни бошладим.

Интернетдан изладим, бошқа қилдим. Оловнинг физик хусусиятларини ўрганиб чиқдим. Олов нега тутайди? Эски печкаларнинг ҳаммасини бирма-бир текшириб, ниҳоят тутамайдиган печка ихтиро қилдим. Синовлардан ўтказдим, тутамади. Натижаси яхши бўлди. Кўмирлар қиммат бўлиб кетяпти борган сари. Тежамкор бўлиши керак-да барибир. Шунинг учун тежамкорликка эътибор бериб, ҳаво берадиган махсус мосламалар ўрнатдим.

Ўйлаб топган печкамнинг бошқа печкалардан фарқи нимада? Ўзбекистон шароитида кўмир энг арзон ёқилғи. Бошқа печкалардан фарқи тагида ҳаво берадиган мосламаси бўлади. Ҳавони маҳкам ушлаб туради, ичкарига ҳаво беришни яхши тақсимлайди. Бунинг ҳисобига уйни иситган, ичидаги ёнаётган кўмир чўғга айланганидан кейин тагидаги ҳавоси беркитиб қўйилса, тежамкор режимга ўтади ва эрталабгача уйни иссиқ ҳароратда ушлаб туради. Тежамкор печкамизга бир кеча учун уйнинг ҳолатига қараб 4 килограммдан 7 килограммгача кўмир ёқилади.

Муҳожирлик...

Бундан бир неча йил аввал Россияда ишлардим, мигрантлик ҳам жонга текканди. “Москвич”имда бозорларга мол таширдим. Бу иш фақат тирикчилик учун эди. Рўзғордан орттириб бирор нарса қила олмасдим.

Ясаган печкамни энг аввал қўшниларга бердим. Кейин қариндош-уруғларга ясаб бердим. Вақт ўтиб печка оммалашиб кетди. “Москвич” мингани ҳам вақт бўлмай қолди. Фаолиятни кенгайтиришга тўғри келди. Мижозлар кўпайиб кетгач, ишчи олдим. Ҳозир қўлимда кўпчилик ишлайди. Керак бўлса печка ясаб улгурмаяпмиз.

Камчиликларини бартараф этиб такомиллаштириб бориб, ихтиро қилган печкамиз мукаммал ҳолатга келди. Мижозлар талабидан келиб чиқиб қайсидир жойларини ўзгартирдик.

Бирор жойга меҳмонга бориб ўзимнинг печкамни кўриб қолсам хурсанд бўлиб кетаман. Ихтиро қилган печкамизда 7 дақиқада 2 литр чой қайнаяпти. Халқимизга тутамайдиган, уй ҳавосини ифлослантирмайдиган тежамкор печка мерос бўлиб қолди. Мен бундан хурсандман”, дейди печкачи уста Лазизбек Абдуҳатов.

Сарвар Зиёев,
Сардор Мамиров,
Kun.uz