Озарбойжон армияси НАТО стандартларига мослаштирилади – Алиев

Илҳом Алиев бу борада Туркия армияси билан яқиндан ҳамкорлик қилаётганини таъкидлади.

Фото: AP

Озарбойжон армияси НАТО стандартларига мослаштирилмоқда. APA хабарига кўра, бу ҳақда Озарбойжон президенти Илҳом Алиев 6 ноябрь куни НАТО делегациясини қабул қилганида айтиб ўтган.

«Давлат раҳбари бу борада Туркия армияси билан яқиндан ҳамкорлик қилаётганини таъкидлади. Шу муносабат билан у мамлакат ва альянс ўртасидаги муносабатларни кенгайтиришнинг ролига тўхталиб ўтди», дейилади хабарда.

Қайд қилинишича, Озарбойжон армиясини модернизация қилиш жараёни давом эттирилади.

Алиев билан учрашувда Туркия, Нидерландия, Шимолий Македония, Греция, Венгрия, Черногория, Норвегия, Словакия, Словения, Швеция, Чехия, Португалия, Испания, АҚШ ва Франциядан НАТО вакиллари иштирок этган.