Колумбия президенти Трамп ва Рубиони “уйқудаги ягуарни уйғотмаслик”ка чақирди

Колумбия президенти Густаво Петро АҚШнинг Кариб денгизидаги кемаларга ҳужумини изоҳлар экан, Қўшма Штатлар президенти Доналд Трамп ва давлат котиби Марко Рубиони "уйқудаги ягуарни уйғотмаслик"ка чақирди. 

Петро Санта-Марта шаҳридаги чиқишида бургут ва кондор ўртасидаги жанг ҳақидаги колумбияликларнинг афсонасини эслаб ўтди. Унинг айтишича, афсонага кўра, бундай жанг ягуарни уйғотиб юбориши ва инсоният тарихини ўзгартириб юбориши мумкин. 

"Мен Рубио ва Трампга шундай деган бўлардим: "Эҳтиёт бўлинг, сизлар халоскорларнинг Кариб денгизини кесиб ўтмоқдасиз, Боливар ватанининг (Венесуэла) ишларига аралашяпсиз"... Афсонага кўра, агар бургут кондорга ҳужум қилса, лотин америкаси халқларининг ягуари уйғонади. Ягуарни уйғотиб юборманг!" – деди у.

Петро мавжуд вазиятда АҚШ билан мулоқот тенгма-тенг олиб борилиши кераклигини айтди. 

"Келинглар, гаплашиб оламиз, фақат бир-биримизнинг кўзларимизга қараб, тенглар олдида тиз чўкмасдан. Чунки агар бургут ҳужум қилишга журъат этса, у қудратли ягуарни кўради ва тарих нафақат Америка, балки бутун инсоният учун ўзгариб кетади", - дея қўшимча қилди Колумбия президенти.

21 октябр куни Густаво Петро АҚШнинг Венесуэлага нисбатан ҳаракатларини қоралади. У Трампни наркотрафикка қарши кураш баҳонасида мамлакатни эгаллаб олишни хоҳлаётганликда айблади. Унинг сўзларига кўра, АҚШ мамлакат нефти устидан назорат ўрнатмоқчи.  

АҚШ наркосавдога қарши курашиш режаси ҳақида маълум қилган ҳамда сентябр ва октябрда Венесуэла соҳиллари яқинида бир нечта катерни йўқ қилган.