Франция: депутатлар пенсия ислоҳотини музлатишни маъқуллади

Франция парламентининг қуйи палатаси — Миллий мажлис 12 ноябр куни пенсия ислоҳотини тўхтатишга овоз берди. Қарорни 255 депутат қўллаб-қувватлади, 146 нафари қарши чиқди.

Депутатлар қабул қилган тузатишга кўра, Францияда пенсия ёши 2027 йилдаги президент сайловларигача 62 ёш-у 9 ой даражасида қолади ва президент Эмманюэл Макрон режалаштирганидек 64 ёшга оширилмайди. «Уч ярим миллион француз пенсияга эртароқ чиқиши мумкин бўлади», — деди социалист депутат Мелани Томин.

Ҳукумат ҳисоб-китобича, бундай ёндашув 2026 йили бюджетга 400 млн евро, 2027 йили эса 1,8 млрд еврогача тушади. Энди депутатлар пенсия ислоҳотини музлатишни молиялаштириш учун умумий ижтимоий бадал (CSG)ни ошириш масаласини муҳокама қилиши керак бўлади. Бундан ташқари, қарорни Франция парламентининг юқори палатаси — Сенат ҳам тасдиқлаши лозим.

Франция бош вазири Себастен Лекорню Миллий мажлисга пенсия ислоҳотини 14 октябр куни тўхтатиб туришни таклиф этган, бу Макрон уни қайтадан ҳукумат раҳбари этиб тайинлаганидан кейин содир бўлди. Мазкур «музлатиш» социалистларнинг асосий талабларидан бири эди — Лекорнюга ишончсизлик вотумининг олдини олиш ва 2026 йил бюджети лойиҳасини парламентдан ўтказиш учун уларнинг овозлари зарур, бу ишни аввалроқ Франсуа Байру уддалай олмаган.

Эмманюэл Макрон пенсия ёшини 62 ёшдан 64 ёшга ошириш тўғрисидаги қонунни 2023 йил апрелида имзолаганди. Президент буни пенсия жамғармасидаги катта тақчиллик билан изоҳлаган. Қонун Конституциянинг 49.3-моддаси асосида — парламентда муҳокама ва овоз беришсиз қабул қилинган.

Сўровномаларга кўра, французларнинг кўпчилиги ислоҳотни рад этган, Макрон қонунни имзолаганидан сўнг мамлакат бўйлаб оммавий намойишлар ўтган.

Парламентни четлаб ўтиб қонун қабул қилиш учун 49.3-моддадан фойдаланишни тўхтатиш — социалистлар Лекорню олдига қўйган иккинчи шарт бўлиб, бош вазир бу талабни ҳам бажаришга ваъда берган.