Марказий Осиёни дўстлик минтақасига айлантиришда президент Мирзиёевнинг ўрни катта – Тўқаев

Қозоғистон президенти Қосим-Жўмарт Тўқаев икки томонлама муносабатлар тарихида ҳозиргача кузатилмаган даражадаги юксак кўтарилиш ва Марказий Осиёни дўстлик ҳамда ҳамкорлик минтақаси сифатида танилишда Ўзбекистон президенти Шавкат Мирзиёевнинг ўрни беқиёс эканини таъкидлади.

Фото: Президент матбуот хизмати

Қосим-Жўмарт Тўқаевга кўра, бугунги кунда Ўзбекистон–Қозоғистон муносабатлари беспрецедент даражада юксак поғонага кўтарилгани, шунингдек, Марказий Осиё бутун дунё миқёсида дўстлик ва ҳамкорлик минтақаси сифатида танилганида катта улуш Ўзбекистон раҳбарига тегишли.

Қозоғистон президенти Шавкат Мирзиёевни ўзбек халқи томонидан эътироф этилган етакчи, халқаро майдонда катта нуфузга эга бўлган, Янги Ўзбекистонни барпо этган йирик давлат арбоби сифатида таърифлади.

Тўқаевнинг таъкидлашича, президент Шавкат Мирзиёевнинг қатъий ва самарали раҳбарлиги туфайли Ўзбекистон кўплаб соҳаларда ҳайратомуз натижаларга эришган, бутун дунёда муваффақиятли ривожланаётган давлат сифатида танилиб бормоқда.