Россия аэропортларида миграция назорати пунктлари ишга туширилди

Пунктлар Москва, Санкт-Петербург, Сочи, Қозон, Новосибирск, Красноярск, Екатеринбург ва бошқа йирик шаҳарлар аэропортларида очилган. Бундай пунктларнинг асосий вазифаси миграция қонунчилигини бузаётган чет элликларни аниқлашдир.

Россиянинг энг йирик аэропортларида дастлабки 12 та миграция назорати пункти иш бошлади. Уларнинг асосий вазифаси миграция қонунчилигини бузган чет эл фуқароларини аниқлашдан иборат, деб хабар берди ИИВ расмий вакили Ирина Волк.

Пунктлар Москва, Санкт-Петербург, Сочи, Қозон, Новосибирск, Красноярск, Екатеринбург ва бошқа йирик шаҳарлар аэропортларида очилган.

Волкнинг қўшимча қилишича, Россия ИИВ Миграция хизмати ва Россия ИИВ Транспорт бош бошқармасининг мувофиқлаштирувчи роли остида ички ишлар органларининг миграция назорати пунктлари чегараолди темир йўл станцияларида, сув ва автомобил ўтказиш пунктлари яқинида ҳам очилади.

Унинг сўзларига кўра, бундай пунктларнинг асосий вазифаси миграция қонунчилигини бузаётган чет элликларни аниқлашдир.

Апрель ойида президент Владимир Путин Миграция масалалари бўйича бош бошқарма негизида Ички ишлар вазирлиги ҳузуридаги Фуқаролик ва чет эл фуқароларини рўйхатга олиш хизматини ташкил этиш бўйича топшириқ берган эди.

Президент матбуот котиби Дмитрий Песковнинг таъкидлашича, янги хизмат «миграция жараёнлари билан боғлиқ масалаларни янада самарали ҳал қилиш, уларни қайта ишлашни тезлаштириш ва идоралар ўртасидаги мувофиқлаштиришни яхшилаш» имконини беради.

Тайёрлаган: Сардор Юсупов

#Россия #миграция #депортация