Трамп «Эпштейн файллари»ни ошкор этиш тўғрисидаги қонунни имзолади

АҚШ президенти Доналд Трамп узоқ вақт қаршилик кўрсатганидан сўнг Эпштейн иши ҳужжатларига оид очиқлик (Efta) тўғрисидаги қонунни имзолади. Ушбу қонун Трамп маъмуриятини ҳозирда марҳум бўлган америкалик молиячи Жеффри Эпштейн иши бўйича материалларни оммага эълон қилишга мажбур қилади. Трамп қонунни имзолаганини чоршанба, 19 ноябр куни, Конгресснинг Оқ уй раҳбарига босими жиддий даражада кучайганидан кейин, Truth Social ижтимоий тармоғида эълон қилди.

Бир кун олдин АҚШ Конгресси Эпштейн ҳужжатларини махфийликдан чиқаришга «яшил чироқ» ёқди. Қонун лойиҳаси 427 овоз билан маъқулланди, бир нафар республикачи конгрессмен қарши овоз берди. Қонун кучга кириши учун фақат Трампнинг имзоси етишмаётган эди.

Энди мамлакат адлия вазирлиги 30 кун ичида Эпштейн иши бўйича «махфий бўлмаган барча ёзувлар, ҳужжатлар, хатлар ва тергов материалларини» ошкор этиши керак. Бу, шунингдек, Федерал тергов бюроси (ФТБ) ва прокуратура ҳужжатларига ҳам тааллуқли. Қонун, шу билан бирга, вазирликни Эпштейннинг 2019 йилда федерал қамоқхонадаги ўлими билан боғлиқ ҳар қандай маълумотларни эълон қилишга мажбур қилади — тахминларга кўра, у ўз жонига қасд қилган. Шунингдек, келгусида ҳеч қандай материални «обрўга зарар етиши ёки сиёсий жиҳати» баҳонаси билан яширишни тақиқлайди.

Шу билан бирга, АҚШ адлия вазири Пэм Бонди фаол федерал терговга ёки давом этаётган жиноий таъқиб жараёнига таҳдид солиши мумкин бўлган материалларни чиқариб ташлаш ҳуқуқига эга.

«Демократлар “Эпштейн” мавзусини, у Республикачилар партиясига қараганда уларнинг ўзига анча кўпроқ тегишли бўлса-да, бизнинг ғоят таъсирли ғалабаларимиздан эътиборни чалғитиш учун фойдаланмоқда», — деб ёзди Трамп қонунни имзолаганини эълон қилар экан, ижтимоий тармоқларда.

АҚШ фуқароларининг мутлақ кўпчилиги Эпштейн иши бўйича ҳужжатлар эълон қилинишини қўллаб-қувватлайди. Сайловолди кампанияси пайтида Доналд Трамп уларни очиқлашга ваъда берган эди, аммо президентлик лавозимига киришганидан (январ ойидан) бери у фақат жуда кам сонли ва ахборот жиҳатдан деярли фойдасиз ҳужжатларни эълон қилишга рухсат берди. Танқидчилар Трампни ўзига нисбатан эҳтимолий алоқадорликни яширишга уринмоқда, деб айбламоқда.

2 сентябр куни Ваколатлар палатаси Назорат қўмитаси аъзолари Эпштейн иши бўйича молиячи меросхўрларидан олинган янги материалларни эълон қилди. Ушбу ҳужжатларнинг айримларидан Трамп марҳумнинг жиноий фаолиятидан хабардор бўлган бўлиши мумкинлиги келиб чиқади.

Сентябр ойида АҚШ Демократик партияси аъзолари, уларнинг таъкидлашича, Доналд Трамп томонидан имзоланган ва 20 йилдан ортиқ вақт олдин молиячи Жеффри Эпштейнга юборилган табрик откриткаси суратини эълон қилди. «Трамп иккаласига алоқадор бўлган “ажойиб сир” ҳақида ёзади. У нимани яширмоқда? Ҳужжатларни эълон қилинг (Эпштейн иши бўйича — таҳр.)», — деб изоҳлади демократлар.

Откритканинг ўзида аёл кишининг силуети тасвирланган бўлиб, устида «Жеффри» ва «Доналд» ўртасидаги диалог матни чоп этилган. У «Туғилган кунинг билан — ва ҳар бир кун янги ажойиб сир бўлсин», деган гап билан якунланади.

Жеффри Эпштейн — америкалик мултимиллионер ва молиячи. У 2000-йиллар бошларида АҚШда вояга етмаган қизларга нисбатан кўплаб жинсий тажовузларда айбланган. 2019 йилда у Ню-Йоркдаги қамоқхона камерасида ўлик ҳолда топилган. Расмий маълумотларга кўра, Эпштейн ўз жонига қасд қилган. АҚШда кўплаб одамлар у машҳур жиноий шериклари фош қилинишининг олдини олиш учун ўлдирилган, деб ҳисоблайди.