Макрон Хитойга қарши кескин чоралар кўрилиши билан таҳдид қилди

Евроиттифоқ яқин вақт ичида Хитойга қарши кескин чоралар кўриши мумкин, деди Франция президенти Эммануэл Макрон Echos газетасига берган интервюсида.

«Мен уларга агар таклифимизга жавоб қайтаришмаса, европаликлар яқин келажакда кескин чоралар кўришимиз ва Хитой маҳсулотларига АҚШ каби божлар киритишимиз мумкинлигини айтдим», — деди у. 

Унинг сўзларига кўра, Хитойнинг савдо профицити беқарор бўлиб, Европа маҳсулотларини жуда кам миқдорда импорт қилади.  

«Хитой тарихан ускуналар ва автомобилсозликка асосланган Европа саноат ва инновацион бозорига зарба бермоқда», — деди Макрон. 

Нашрнинг қайд этишича, Хитой экспортининг ўсиши фонида Европа бозорида хавотирли вазият юзага келган.  

Макрон Хитойда уч кунлик давлат ташрифи билан бўлди ва Bloomberg агентлигининг хабарига кўра, инвестицияларни ошириш бўйича келишувга эришди.

Агентликнинг Франция ғазначилиги маълумотларига асосланиб ёзишича, ўтган йили Франция ва Хитой ўртасидаги савдо дефицити қарийб 47 млрд еврони ташкил этган.  

2024 йилда Франция ЕИнинг Хитой электромобилларига бож киритиш тўғрисидаги қарорини қўллаб-қувватлаганидан сўнг Париж ва Пекин ўртасидаги муносабатлар кескинлашганди. Бунга жавобан Хитой Франция конякларига нисбатан минимал нархлар белгилаган, бу эса Франциядаги бошқа ишлаб чиқарувчилар орасида ҳам хавотир уйғотганди.