Франция яна Россия «яширин флоти»га мансуб танкерни қўлга олди

Бу – йил бошидан буён тўртинчи шундай ҳолат бўлмоқда.

Франция ҳарбий-денгиз кучлари Сицилия соҳиллари яқинида халқаро денгизчилик ҳуқуқини бузган ҳолда сузаётган Deliver номли нефт танкерини қўлга олди. Бу ҳақда Франция президенти Эммануэл Макрон маълум қилди.

Камерун байроғи остида сузган ушбу кема Приморскдан Сингапурга кетаётган бўлган.

Макрон танкер бортига вертолётдан махсус топшириқли бўлинма жангчилари туширилаётгани акс этган видеони эълон қилди.

Макрон бу «яширин флот»га қарши ўтказилган навбатдаги амалиёт бўлганини қайд этган ва бир неча кун олдин Буюк Британия ҳам шундай амалиёт ўтказганини эслатган.

«Биз яширин флот санкцияларни четлаб ўтиб, Россия олиб бораётган урушни молиялаштиришига йўл қўймаймиз. Европа қатъият кўрсатади», – дея ёзган у.

2026 йил бошидан буён Франция бир неча бор Россиянинг «яширин флоти»га мансуб бўлган танкерларини тўхтатган. Улардан биринчиси январ ойида қўлга олинган «Гринч» танкери эди. Март ойида эса «Дейна» танкери таъқиб остига тушган – фақат бир ой ўтиб унга Марсел портини тарк этишга рухсат берилган. 1 июн куни Атлантика океанида «Тагор» нефт танкери француз ҳарбийлари томонидан қўлга олинди. Июн ойи ўрталарида Буюк Британия Ла-Манш бўғози орқали ўтишга уринган, Россияга алоқадор бўлган Smyrtos номли нефт танкерини қўлга олиб, ўз соҳилларига олиб кетганди. Сўнгги хабарларга кўра, Буюк Британия ҳукумати унинг бортидаги 100 минг тоннадан ортиқ нефтни сотиб юбормоқчи.