АҚШ бир йил ичида 2,5 миллион ноқонуний мигрантни чиқариб юборди

АҚШ Ички хавфсизлик вазирлигининг маълум қилишича, Доналд Трамп ҳокимият тепасига келганидан буён мамлакатни 2,5 миллион ноқонуний мигрант тарк этган.

«600 минг ноқонуний мигрант 365 кундан камроқ вақт ичида мамлакат ҳудудидан депортация қилинди. Ўз-ўзини депортация қилишдан фойдаланган 1,9 миллион киши билан биргаликда [АҚШни тарк этган] ноқонуний мигрантларнинг умумий сони 2,5 миллиондан ошди», дейилади вазирлик хабарида.

Бунда энг хавфли ҳуқуқбузарлар - оғир жиноят содир этган шахсларни мамлакатдан чиқариб юборишга устувор аҳамият қаратилаётгани таъкидланган.

«Ноқонуний мигрантлар бизнинг кетиш чақириғимизни эшитмоқда. Агар улар буни ихтиёрий равишда қилмаса, биз уларни топамиз, ҳибсга оламиз ва уларнинг АҚШга қайтиш имконияти бутунлай ёпилади», дейилади вазирлик хабарда.

Ҳисоботда, шунингдек, мигрантларга уйга бепул қайтиш ва 1 минг доллар миқдорида бир марталик ёрдам олиш имкониятини берувчи махсус иловадан фойдаланишга чақириқ бор.

Аввалроқ, ўзидан олдинги президент Жо Байден маъмуриятини «очиқ чегара» ва жиноятчилар оқими учун танқид қилган АҚШ президенти Доналд Трамп энди АҚШ тарихидаги энг йирик депортация операциясини ўтказишга ваъда бермоқда.