АҚШ Венесуэла соҳиллари яқинида жуда йирик нефть танкерини мусодара қилди

10 декабрь куни АҚШ президенти Доналд Трамп Венесуэла соҳиллари яқинида санкция остидаги нефть танкери мусодара қилинганини маълум қилди. Reutersʼнинг ёзишича, бу ҳаракат нефть нархларининг кўтарилишига ва Вашингтон билан Каракас ўртасидаги кескинликнинг кескин ошишига олиб келди.

«Биз Венесуэла соҳилида бир танкер мусодара қилдик, катта танкер, жуда катта. Аслида ҳеч қачон бўлмаган даражада энг каттаси ва яна бошқа нарсалар ҳам бўляпти», деди Трамп. У Венесуэла президенти Николас Мадурони истеъфога чиқишга мажбурлаш учун босим ўтказиб келмоқда.

Нефтга нима бўлиши ҳақида сўралганда, Трамп: «Уни ўзимизда сақлаймиз, менимча», деб жавоб берди.

АҚШ бош прокурори Пам Бонди эълон қилган видеога кўра, ФҚБ, Ички хавфсизлик департаменти, Соҳил хавфсизлик хизмати ва АҚШ ҳарбийларининг кўмагида Венесуэла ва Эроннинг санкцияланган нефтини ташиш учун ишлатилган хом нефть танкерига нисбатан мусодара ордери ижро этилган.

KNOCKOUT.

If you threaten our nation, or break the law, there is no place on land or sea where we won’t find you.

Thank you to the brave service members from @USCG, @ICEGOV, @FBI, @DeptofWar, and @TheJusticeDept. pic.twitter.com/KUCRjES267

— Homeland Security (@DHSgov) December 11, 2025

Бонди жойлаштирган 45 сониялик видеода икки вертолёт кема томон яқинлашаётгани ва камуфляж кийимдаги қуролланган шахслар ундан пастга тушаётгани акс этган. Трамп маъмурияти расмийлари на кеманинг номини, на жойлашувини очиқлади.

Британиянинг денгиз хавфсизлиги компанияси Vanguard — жуда йирик хом нефть ташувчиси Skipper чоршанба куни эрталаб Венесуэла яқинида мусодара қилинган, деб ҳисобланмоқда. АҚШ бу танкерга Эрон нефти савдосида қатнашган деб санкция қўйган, ўша пайтда у Adisa деб аталган.

Reuters маълумотларига кўра, Skipper 4–5 декабрь кунлари Венесуэланинг асосий Жосе портидан 1,8 миллион баррель Мерей оғир хом нефтини юклаб чиқиб кетган. У мусодара қилинишидан олдин тахминан 200 минг баррелни Куба томон йўл олган бошқа кемага кўчирган.

Венесуэла ҳукумати ўзининг жавоб баёнотида АҚШни «ошкора ўғирлик»да айблади ва мусодарани «халқаро қароқчилик ҳаракати» деб таърифлади. Ҳукумат бу ҳодисани халқаро ташкилотлар олдида муҳокама қилишини билдирди. Мадуро чоршанба куни Венесуэладаги намойишда нутқ сўзлади, аммо мусодара ҳақидаги хабарларни тилга олмади.

Трамп Венесуэлага АҚШнинг ҳарбий аралашуви эҳтимоли ҳақида қайта-қайта гапириб келмоқда. Ушбу мусодара — АҚШ санкциялари даврида Венесуэла нефть юкининг биринчи мусодара қилиниши ҳисобланади.

Трамп маъмурияти сентябрь бошидан буён Кариб ва Тинч океанида наркотик ташишда гумон қилинган кемаларга нисбатан 20 дан ортиқ зарбалар уюштирган, бу жараёнда 80 дан кўпроқ киши ҳалок бўлган.

Мутахассисларнинг айтишича, бу зарбалар ноқонуний бўлиши мумкин. Кема ҳақиқатан ҳам наркотик ташиётганини ёки уни портлатиб юбориш зарур бўлганини исботловчи далиллар жамоатчиликка тақдим этилмаган. Одатда кема тўхтатилиши, юк мусодара қилиниши ва экипаждан сўроқ олиниши мумкин эди.

Мусодара ҳақидаги хабарлар ортидан нефть нархларидан бироз кўтарилиш кузатилди.

Вашингтон Мадурони босим остига олаётган бўлса-да, Трамп маъмурияти илгари нефть оқимига бевосита аралашмаганди. Рақобат кучайгани учун Венесуэла Хитойга сотаётган нефтини катта чегирма билан беришга мажбур бўляпти. Рақобатнинг ўзи эса Россия ва Эроннинг санкция остидаги нефти билан боғлиқ.