Австрия АҚШга Дмитрий Фирташни бермаслик ҳақида якуний қарор қабул қилди

Австрия АҚШга украиналик бизнесмен Дмитрий Фирташни бермасликка масаласига нуқта қўйди. Венадаги Олий суд чоршанба, 10 декабр куни маълум қилишича, у бир кун олдин прокуратуранинг апелляция шикоятини формал асослар туфайли рад этган. Шу тариқа, 2024 йил ноябридаги қарор — халқаро ҳуқуқ бўйича мавжуд иммунитет сабабли уни экстрадиция қилишни рад этган суд қарори кучга кирди.

Олий суд ўз қарорини прокуратура апелляция бериш учун белгиланган муддат аллақачон ўтиб бўлгани билан изоҳлади.

АҚШ Фирташни чет элда коррупцияга қарши қонунни (Foreign Corrupt Practices Act) бузганликда айблаб, унинг экстрадициясини талаб қилиб келаётган эди. Қўшма Штатларда уни Ҳиндистондаги ҳукумат аъзоларини пора бериш орқали Ҳиндистоннинг Андхра-Прадеш штатида жойлашган титан конларини ўзлаштиришга рухсат олишга уринган, деб айблашмоқда. Бизнесмен эса ўзини айбдор деб билмаслигини, жиноят иши унга нисбатан сиёсий сабаблар билан қўзғатилганини таъкидлаб келди.

2014 йилда олигарх АҚШ Адлия вазирлигининг, уни экстрадиция қилиш ҳақидаги сўрови асосида Австрияда қўлга олинган, аммо кейинроқ 125 миллион евро миқдорида гаров эвазига қамоқдан озод этилган. Қўшма Штатларда унга 50 йилгача озодликдан маҳрум қилиш ва мулкини тўлиқ мусодара қилиш жазоси хавф солиб турибди.

Ғарбий таҳлилчилар ва украиналик расмийлар бир неча бор таъкидлашича, Дмитрий Фирташ Россия президенти Владимир Путин билан боғлиқ алоқалари туфайли Украинадаги энг нуфузли саноатчилардан бири бўлган. 2000-йилларда у Украина ва Европага Россия газини етказиб беришни назорат қилган давлат газ трейдери — «РосУкрЭнерго» компаниясида асосий шахс бўлган. Reuters агентлиги маълумотларига кўра, Фирташ Кремл учун қулай воситачи ролини ўйнаган ва шунинг эвазига имтиёзли нархларда 20 млрд куб метрдан ортиқ газ, шунингдек «Газпромбанк»дан 11 млрд доллардан ортиқ кредит олган.