Германия: Тинчлик келишуви — ғарб кучларини Украинага юбориш учун асосий шарт

Германия ҳукумати фикрича, ғарб давлатлари ҳарбий хизматчиларидан ташкил топган “кўпмиллатли кучлар”ни Украинага жўнатиш учун асосий шарт — Киев билан Москва ўртасида тинчлик келишуви имзоланишидир. Бу ҳақда Германия ҳукуматининг расмий вакили Себастиан Хилле душанба куни, 29 декабрда маълум қилди.

“Бир нарса аниқ: Украинага АҚШ ва европаликлар томонидан ҳам ҳуқуқий, ҳам моддий жиҳатдан салмоқли хавфсизлик кафолатлари керак”, — деб таъкидлади у. Хилленинг айтишича, Германия ҳукумати АҚШ президенти Доналд Трампнинг Украинада тинчликка эришишга қаратилган саъй-ҳаракатларини ижобий баҳолайди. “Эндиликда навбат Россияда — урушга чек қўйиш ва адолатли тинчликка келиш”, — деб ҳисоблайди Хилле.

Украина учун хавфсизлик кафолатлари муҳокама қилинаётган шароитда Европа давлатлари келажакдаги тинчлик келишувини таъминлаш учун “кўпмиллатли кучлар” тузишни таклиф қилди. Бундай кузатув миссияси Украина осмони ва денгизни ҳимоя қилади, Украина Қуролли кучларини қайта тиклашга кўмаклашади, шунингдек разведка ва моддий-техникавий таъминот (логистика) қўллаб-қувватлашини амалга оширади.

2025 йил 24 декабрда Украина президенти Володимир Зеленский Россиянинг тажовузкор урушини тўхтатиш бўйича музокара томонлари муҳокама қилаётган 20 банддан иборат тинчлик режаси лойиҳасини илк бор ошкор қилди. Жумладан, унинг 14-бандида тинчлик келишуви имзоланган санада Россия ва Украина қўшинлари тўқнашув чизиғи бўйлаб халқаро кучларни жойлаштириш назарда тутилган.

28 декабр куни Володимир Зеленский ва Доналд Трамп Флоридада музокаралар ўтказган. Уларнинг якунларига кўра, Украина президенти тинчлик режаси 90 фоизга келишилгани, АҚШ томонидан хавфсизлик кафолатлари эса тўлиқ тасдиқланганини айтган. Бироқ Зеленский бу кафолатлар аниқ нималарни ўз ичига олишини очиқламаган.

Унинг сўзларига кўра, ҳозир томонлар Украина учун 15 йиллик, кейин узайтириш имкони бор хавфсизлик кафолатлари вариантини муҳокама қилмоқда. Шу билан бирга, Украина президенти Оқ уй раҳбаридан бу муддатни 30–50 йилгача кенгайтиришни сўраган.