Трамп дунёдаги эҳтимолий «энг ёмон» давлатни айтди

Оқ уй раҳбарининг сўзларига кўра, Сомали шундай мамлакат.

Фото: Andrew Harnik / Getty Images

Сомали, эҳтимол, дунёдаги энг ёмон ва коррупциялашган давлатдир, деди АҚШ президенти Доналд Трамп Truth Social ижтимоий тармоғида ва сомалиликларни ватанига қайтаришни талаб қилди.

АҚШ президентининг таъкидлашича, «Миннесотадаги фирибгарликларнинг катта қисми, яъни 90 фоизигача Сомалидан мамлакатга ноқонуний равишда келган одамлар томонидан содир этилади».

«Уларни қаердан келган бўлса, ўша ерга, Сомалига, эҳтимол, ер юзидаги энг ёмон ва энг коррупциялашган мамлакатга жўнатинг», деб ёзади у.

Биринчи президентлик муддатида у бир қатор давлатлар, жумладан, Сомали фуқароларига Қўшма Штатлар ҳудудига киришни тақиқлади, бироқ АҚШ навбатдаги президенти Жо Байден бу қарорни бекор қилди. Трамп иккинчи президентлик муддатига киришганида тақиқни тиклади ва унга яна бир неча давлат фуқароларини қўшди.

Бундан ташқари, АҚШ Сомалида ИШИД билан алоқадор жангариларга бир неча бор авиазарбалар берган.

Тайёрлаган: Сардор Юсупов

#АҚШ #Сомали #Доналд Трамп