Кўп хонадонли уй-жойлар майдони босқичма-босқич оширилади

“Ўзбекистон–2030” стратегияси лойиҳасида инфратузилма лойиҳаларини барқарор ва узоқ муддатли молиялаштириш манбалари билан таъминлаш устувор вазифалардан бири сифатида белгиланган. Шу йўналишда аҳолининг яшаш шароитларини яхшилаш, уй-жой фондини кенгайтириш ва кўп хонадонли уй-жойлар инфратузилмасини босқичма-босқич модернизация қилишга қаратилган чора-тадбирлар ҳам назарда тутилмоқда.

Лойиҳага кўра, 2026–2030 йиллар мобайнида ҳудудларда қуриладиган кўп хонадонли уй-жойларнинг умумий фойдаланиш майдони (квадрат метр) сонини 10 га ошириш кўзда тутилган. Мазкур кўрсаткич, лойиҳа матнидан келиб чиқиб, янги уй-жой массивлари барпо этилиши ва кўп квартирали бинолар ҳажми босқичма-босқич кенгайиб бориши орқали таъминланиши мумкин.

Шу билан бирга, уй-жой қурилиши кўламини ошириш масаласи инфратузилма билан узвий боғлиқ экани таъкидланади. Чунки янги кўп хонадонли уй-жойлар барпо этилиши билан бир вақтда муҳандислик-коммуникация тармоқлари (сув, канализация, электр, газ), йўл-транспорт ечимлари ва аҳолига хизмат кўрсатиш инфратузилмаси ҳам мос равишда кенгайишини талаб қилади. Шу боис стратегия лойиҳасида инфратузилмани барқарор молиялаштириш манбалари билан таъминлаш масаласи алоҳида қайд этилган.

Стратегия лойиҳасида уй-жой ва инфратузилма йўналишида яна бир нечта муҳим вазифалар ҳам келтирилган. Жумладан:

ичимлик суви хизматларидан доимий фойдаланиш имкониятига эга аҳоли улушини 85 фоизгача ошириш (310-банди);
республикадаги 100 фоиз лифт ва аттракционларнинг мувофиқлигини декларациялаш (312-банди);
2025–2028 йилларда кўп квартирали уй-жойлардаги 2383 та лифт ускуналарини таъмирлаш ва янгилаш (313-банди).

Мутахассислар нуқтаи назаридан, кўп хонадонли уй-жойлар майдонини ошириш бўйича режалар амалга оширилишида лифтлар, муҳандислик тармоқлари ва коммунал хизматлар сифатини таъминлаш масаласи ҳам ҳал қилувчи аҳамият касб этади. Шу маънода, лифтларни янгилаш ва декларациялаш, шунингдек, ичимлик суви қамровини кенгайтиришга оид мақсадлар уй-жой қурилиши сиёсати билан бир занжирда кўрилади.

Келтирилган мақсад ва кўрсаткичлар “Ўзбекистон–2030” стратегияси лойиҳасида акс этган бўлиб, унинг якуний тасдиқланиши жараёнида бандлар таҳрири ва формулировкалари аниқлаштирилиши мумкин.