Кўп квартирали уйларда яшовчилар сони аввал айтилган расмий рақамлардан анча камлиги маълум бўлди

Ўзбекистонда коммунал соҳа масъуллари январ ойида кўп квартирали уйларда яшовчилар сони 7,1 млн нафар эканини маълум қилганди. Аҳолини рўйхатга олиш натижалари эса бошқача манзарани кўрсатди: 4,8 млн ўзбекистонлик кўп қаватли уйлардаги хонадонларда истиқомат қилади, бу – умумий аҳолининг 12 фоизига тенг. Жами аҳолининг 86 фоизи, Тошкент шаҳрида яшовчиларнинг эса 45 фоизи ҳовли уйларда истиқомат қиляпти.

Фото: Kun.uz

Ўзбекистон аҳолисининг мутлақ аксарияти – 86 фоизи ҳовли уйларда, 12 фоизи кўп квартирали уйлардаги хонадонларда истиқомат қилади.

Тошкент шаҳрида эса аҳолининг 45 фоизи ҳовли уйларда, 51 фоизи кўп квартирали уйларда яшамоқда.

Ушбу манзара аҳолини рўйхатга олишнинг дастлабки натижаларидан маълум бўлди.

Миллий статистика қўмитаси ҳисоботига кўра, 2026 йил бошида рўйхатга олинган 39 млн 47 минг аҳолининг турар жой турлари бўйича тақсимланиши қуйидагича:

шахсий якка тартибдаги ҳовли ва дала ҳовли – 33 млн 689 минг;
кўп қаватли уйдаги хонадон – 4 млн 826 минг;
талаба ва ўқувчилар ётоқхонаси – 61 минг;
бошқа ётоқхоналар – 63 минг;
яшаш учун фойдаланиладиган нотурар жой – 58 минг;
меҳмонхона, оилавий меҳмон уйи, ҳостел – 3,5 минг;
бошқа турдаги турар жой – 347 минг.

Қайд этиш лозим, 2026 йил 14 январ куни кўп квартирали уйларни бошқариш соҳаси бўйича давлат раҳбарига қилинган таклифлар тақдимотида республика бўйлаб 44 мингдан ортиқ кўп квартирали уйда 7,1 млн аҳоли истиқомат қилиши айтилган эди. Рўйхатга олиш натижасида эса, кўп квартирали уйларда яшовчилар сони 4,8 млн экани ойдинлашди.

Кўп квартирали уйларда яшовчилар

Рўйхатга олиш натижаларига кўра, пойтахт Тошкентда доимий яшовчилар сони 3 млн 225 минг нафарни ташкил этган. Шундан 1 млн 454 мингга яқини (45 фоизи) ҳовли уйларда, 1 млн 655 минг нафари (51 фоизи) эса кўп квартирали уйларда яшайди.

Кўп квартирали уйларда яшовчилар сони Тошкент вилоятида 605 минг, Фарғона вилоятида 429 минг, Самарқанд вилоятида 306 минг, Навоий вилоятида 301 минг, Андижон вилоятида 203 минг, Бухоро вилоятида 202 минг нафарни ташкил этади.

Урбанизация

Аҳолини рўйхатга олишнинг дастлабки натижаларига қараганда, Ўзбекистон аҳолисининг 21,3 млн нафари ёки 54,5 фоизи шаҳарларда, 17,8 млн нафари ёки 45,5 фоизи эса қишлоқ жойларда яшайди.

Пойтахт Тошкентдан кейин энг кўп шаҳарлашган (аҳолиси таркибида шаҳарда яшовчилар улуши энг юқори) ҳудуд – Наманган вилояти. Бу вилоят аҳолисининг 66,2 фоизи шаҳарларда истиқомат қилади.

Навоий (59,3 фоиз), Фарғона (56,2 фоиз), Андижон (52,2 фоиз), Жиззах (51,4 фоиз) ва Тошкент вилоятларида (58,7 фоиз) ҳам аҳолининг ярмидан кўпи шаҳарларда яшамоқда.

Хоразм вилояти аҳолисининг 61,9 фоизи қишлоқларда ҳаёт кечиряпти. Қишлоқ аҳолисининг улуши Самарқанд вилоятида 60,1 фоиз, Сурхондарё вилоятида 59,4 фоиз, Бухоро вилоятида 57,5 фоизни ташкил этади.