Нефт, такрорий ҳужум ва сиёсатчиларга огоҳлантириш. Трамп матбуот анжуманида нималар ҳақида гапирди

АҚШ президенти Доналд Трамп Венесуэла президенти Николас Мадурони ҳокимиятдан ағдариш мақсадида амалга оширилган операция бўйича матбуот анжумани ўтказди.  

У матбуот анжуманида Мадуро ва Венесуэла келажаги, АҚШнинг режалари борасида қатор баёнотлар берди.

АҚШ президенти Венесуэлага такрорий ҳужум бўлиши мумкинлигини айтиш билан бирга, Венесуэладаги сиёсатчиларни огоҳлантирди.

Унинг сўзларига кўра, Мадуро бункерга яширинишга уринган, лекин америкалик ҳарбийлар бунга йўл қўйишмаган.

“Катта отишма бўлди. АҚШ 47 сония ичида ҳамма ерни тозалади ва Мадуронинг қочишига имкон бермади”, — деди Трамп.

Трампнинг айтишича, Мадуро қаршилик кўрсатган тақдирда ўлдирилиши мумкин эди.

“Биз ҳужумнинг иккинчи тўлқинини амалга оширишимиз ҳам мумкин, у янада кучлироқ бўлади, бунга тайёрмиз. Венесуэладаги барча сиёсий фигуралар тушуниши даркор – Мадуро билан юз берган ҳолат бошқа ҳар ким билан ҳам содир бўлиши мумкин”, - деди у.

Трамп аввалроқ АҚШга нисбатан кескин баёнотлар билан чиққан Колумбия президенти Густаво Петрони ҳам огоҳлантирди.

“Колумбия президенти ўзини эҳтиёт қилиши керак”, - деди у.

Трамп Венесуэлани АҚШ нефтини тортиб олишда айблади.

“Венесуэладаги бутун нефт инфратузилмасини америкаликлар қурган, социалистлар эса буларнинг барчасини биздан тортиб олди. Венесуэла шунингдек, АҚШнинг миллиардлаб долларлик активлари, платформалари ва пулларини ҳам тортиб олди. Бунга қарши ҳеч ким ҳеч нарса қилмади. Америка бошқа мамлакатлар уни талашига йўл қўймайди. АҚШ Венесуэладан Америка нефт компаниялари учун компенсация ундиради”, - деди Америка раҳбари.

“Наркокартеллар жуда шафқатсиз эди, лекин энди бундай бўлмайди. Қуролли кучларимиз олиб бораётган чиройли ишларни эътироф этиш керак. Бошқа мамлакатларда ҳам, ўзимизда ҳам. Бунинг устига, Мадуро режими бошқа мамлакатларнинг ҳарбий маслаҳатчиларидан фойдаланган ва кеча бизга қарши хорижий қуролни ишлатди. Ўнлаб йиллар давомида бошқа маъмуриятлар Венесуэла кўринишидаги минтақавий таҳдидни инкор этиб келди, баъзан эса ҳатто унинг кучайишига кўмаклашди”, - деди у.

Трамп матбуот анжумани давомида Венесуэла мухолифати етакчиси Мария Корина Мачадони ҳам тилга олиб ўтди.

“Мачадо Венесуэла етакчиси бўла олмайди, унда етакчилик қобилияти йўқ, у шунчаки ёқимтой”, - деди АҚШ президенти.  

Трампнинг сўзларига кўра, Венесуэла вице-президенти АҚШ вице-президентига АҚШ нима деса шуни бажаришга тайёрлигини билдирган.

Доналд Трамп Венесуэла ўз ҳудудида хорижий кучларни жойлаштиргани ва АҚШга таҳдид солувчи ҳужум қуролларини сотиб олганини айтаркан, агар зарур бўлса АҚШ Венесуэлада ўз қўшинларини жойлаштириши мумкинлигини таъкидлади.

У Россия-Украина урушига ҳам тўхталиб ўтди.

“Мен Украина ва Россия низосини энг енгил низо деб ўйлагандим, аммо ҳозирча уларни яраштира олмадим. АҚШ Украина можаросида пул йўқотмаяпти, балки пул ишлаяпти”, - деди у.

Трампнинг қўшимча қилишича, у Путин билан Мадуро ҳақида ҳеч қачон гаплашмаган. Доналд Трамп Путин билан Украина масаласидаги мулоқотлардан кўнгли тўлмаётгани, лекин тинчлик ўрнатиш масаласида олдинга силжиш борлигини таъкидлади.

“Бу уруш қонли ҳаммомга айланди ва биз бунга чек қўйишни хоҳлаймиз. Бу Байден, Зеленский ва Путиннинг уруши”, — деди у.