Ўтган кун давомида жаҳонда рўй берган энг асосий воқеа ва янгиликлар шарҳи билан кундалик хабарномада таништирамиз.
АҚШ Гренландияни ҳам олмоқчи
АҚШ президенти Доналд Трамп Гренландияни қўлга киритиш учун «турли вариантларни», жумладан, ҳарбий кучдан фойдаланишни ҳам муҳокама қилмоқда.
«Президент ва унинг жамоаси ушбу муҳим ташқи сиёсий мақсадга эришиш учун турли вариантларни муҳокама қилмоқда. Албатта, АҚШ ҳарбий кучидан фойдаланиш ҳар доим Олий қўмондон ихтиёридаги вариант ҳисобланади», деди Керолин Левит.
Бу баёнот Европа етакчилари Данияни қўллаб-қувватлаб қўшма баёнот чиқарганидан бир неча соат ўтиб янгради. Дания Трампнинг Арктикадаги орол бўйича даъволарига қарши чиқиб келмоқда.
«Гренландия унинг халқига тегишли. Фақат Дания ва Гренландия ўзаро муносабатларига оид масалаларни ҳал қилиши мумкин», — дейилади Буюк Британия, Франция, Германия, Италия, Полша, Испания ва Дания етакчилари имзолаган қўшма баёнотда.
Улар Арктика хавфсизлиги АҚШ учун қанчалик муҳим бўлса, ўзлари учун ҳам шунчалик муҳим эканини таъкидлаб, бу НАТО иттифоқчилари, жумладан, АҚШ билан «жамоавий» тарзда таъминланиши кераклигини айтди.
Гренландия масаласи АҚШнинг Венесуэлага ҳарбий аралашуви фонида яна кун тартибига чиқди. Чунки ўша операциядан кейин Трампнинг яқин инсонларидан бири Гренландия харитасини АҚШ байроғи рангларида жойлаб, ёнига «ТEЗ ОРАДА» деган ёзувни қўшганди.
АҚШ давлат котиби Марко Рубио эса Конгрессдаги ёпиқ йиғилишда Трамп маъмурияти Гренландияга бостириб киришни режалаштирмаётганини, аммо уни Даниядан сотиб олиш эҳтимоли муҳокама қилинаётганини айтган.
Яман сепаратистларининг бошлиғи қочиб кетди
Яманнинг Жанубий ўтиш кенгаши раҳбари Аидарус аз-Зубайди Ар-Риёдга учиши керак бўлган самолётга чиқолмади ва бунинг ўрнига номаълум йўналишга қочиб кетди. Бу ҳақда Яманда Саудия томонидан қўллаб-қувватланадиган ҳукумат кучлари маълум қилди.
Зубайди Яманнинг жануби масаласи бўйича форумда қатнашиш учун Саудия Арабистонига йўл олиши керак эди.
Коалиция вакили Турки ал-Маликий баёнотида айтишича, сепаратист гуруҳнинг кўплаб юқори мартабали раҳбарлари бўлган рейс уч соатдан ортиқ кечикканидан сўнг Зубайдисиз учиб кетган. Унинг қаерда экани ҳақида ҳеч қандай маълумот бўлмаган.
