Россияда судланган франциялик Винате Даниил Касаткинга алмаштирилди

Россияда “жосуслик иши” бўйича судланган француз сиёсатшуноси Лоран Винате Францияда АҚШ сўровига кўра ушлаб турилган россиялик Даниил Касаткинга алмаштирилди. Пайшанба куни, 8 январда Винате Францияга етиб келганини Франция Ташқи ишлар вазирлиги ва мамлакат президенти Эммануэл Макрон маълум қилди.

Фото: Alexander Zemlianichenko/AP Photo/picture alliance

“Юртдошимиз Лоран Винате озодликда ва Францияга қайтди. Унинг оиласи ва яқинлари ҳис қилаётган енгиллик туйғусини мен ҳам баҳам кўраман. Дипломатларимизга миннатдорчилик билдираман”, — деб ёзди Макрон X платформасида. ТАСС давлат ахборот агентлиги ёзишича, алмашинув амалга ошиши учун Винате Россия президенти Владимир Путин фармони билан афв этилган.

Касаткин адвокати Фредерик Бело эса россиялик спортчи ўтган тун қамоқдан озод этилганини билдирган. Шундан сўнг Касаткин самолётга чиқарилган ва у аллақачон Москвага қўниб улгурган.

Россия ва Марказий Осиё бўйича эксперт, сиёсатшунос Лоран Винате Россия фуқароси билан турмуш қурган. У 2014 йилдан бери Швейцариядаги нодавлат ташкилот — “Гуманитар мулоқот маркази”да (Center for Humanitarian Dialogue) Украинадаги ташкилий фаолият бўйича маслаҳатчи лавозимида ишлаган.

У 2024 йил июн ойида “РФ ҳарбий фаолияти соҳасида маълумот тўплаш” моддаси асосида, “чет эл агенти” сифатида рўйхатдан ўтмаган ҳолда шундай маълумотлар йиғганликда айбланиб ҳибсга олинган. 2025 йил ёзида Винатега нисбатан яна бир — жосуслик моддаси бўйича янги жиноий иш қўзғатилган. Ўша йил октябрида суд уни уч йил колония жазосига ҳукм қилиб, Россия ҳарбийлари ҳақида маълумот тўплагани ва “чет эл агенти” сифатида рўйхатдан ўтмаганини айб сифатида кўрсатган. Декабр охирида эса РФ томонидан Винате иши бўйича Францияга таклиф йўллангани ҳақида хабар берилган эди.

Россиялик баскетболчи Даниил Касаткин, олдин Москвадаги МБА-МАИ профессионал клубида ўйнаган, 2025 йил июн ойида Парижнинг Руасси — Шарл-де-Голл аэропортида АҚШ сўрови асосида ушланган. АҚШ ҳукумати уни 2020–2022 йилларда тахминан 900 та компанияга (жумладан икки федерал муассасага) шифрлаб-қулфловчи дастурлар (ransomware) орқали ҳужум қилган ҳакерлар гуруҳи фаолиятида иштирок этганликда гумон қилган. Терговга кўра, Касаткин товон пули тўлаш бўйича музокараларда ҳакерлар номидан қатнашган. Касаткин айбини инкор этади.

Париж апелляция суди 29 октябр куни уни АҚШга экстрадиция қилиш ҳақидаги сўровни маъқуллаган, бироқ Франция бош вазири Себастен Лекорню уни топшириш тўғрисидаги қарорни имзолашдан бош тортган.

Сўнгги йилларда Россияда бир қатор хорижий фуқаролар ҳибсга олинган. Ғарб давлатлари Москвани улардан Ғарбда ҳибсда бўлган россияликларга алмаштириш учун “гаров” сифатида фойдаланишда айблаб келади.