Танкерлар Венесуэла сувларида АҚШ таъқибидан оммавий қочмоқда – ОАВ

АҚШ ҳарбий кемалари АҚШ денгиз блокадасини бузган ҳолда Венесуэла яқинидаги сувлардан Атлантика океанига чиққан ва санкция остидаги бир қанча нефт танкерларини таъқиб қилмоқда, деб ёзди The New York Times. Нашр сунъий йўлдошдан олинган суратлар таҳлили ва исми ошкор этилмаган америкалик ҳарбий билан суҳбат асосида шундай хулосага келган.

«Ушбу кемаларнинг аксариятига нефт юкланган, улар қуруқликдан юзлаб мил узоқда жойлашган ва афтидан, шарққа, Африка ва Европага йўл олган», деб ёзди нашр.

Танкерлар ўтган дам олиш кунлари Венесуэла сувларини оммавий равишда тарк этиб, қамални четлаб ўтишга ҳаракат қилмоқда. Иштирок этган 16 та кемадан фақат биттаси - M Sophia - Кариб денгизида Америка кучлари томонидан тўхтатилди.

Қолган 15 та танкердан тўрттаси Атлантика океанида Шарққа қараб кетаётганда, қуруқликдан камида 400 мил узоқликда кўринган. Бешта кемадан иборат иккинчи гуруҳ Кариб денгизи орқали ҳаракатланаётганда аниқланган.

Сунъий йўлдошдан олинган суратларга Атлантика орқали сузиб кетаётган танкерлар томон йўл олган Америка эсминеци ҳам тушиб қолган. Битта танкер яна Колумбия қирғоқларида пайдо бўлди, қолган бешта кеманинг қаердалиги ҳозирча номаълум.

Нефт ортилган танкерлардан камида биттаси - Veronica шу ҳафта ўз номини Галилео деб, байроғини эса Россия байроғига ўзгартирди, дея таъкидлайди нашр.

Вашингтон Венесуэла нефти экспортини назорат қилиш бўйича саъй-ҳаракатлари доирасида сўнгги ҳафталарда бешта кемани қўлга олди.

Танкерларнинг дастлабки қўлга олиниши декабр ойида, АҚШ президенти Доналд Трамп Венесуэла нефтини ташувчи санкцияланган танкерларни тўлиқ блокада этишни эълон қилганидан кейин содир бўлган эди.