Венесуэла бир қатор нуфузли мухолифатчилар ва фаолларни озод қилди

8 январ куни Венесуэла бир неча юқори мартабали мухолифатчиларни озод қилди, деб хабар берди Euronews. Каракас буни «тинчликка интилиш» ишораси деб атади, Америка қўшинлари ҳарбий операция чоғида президент Николас Мадурони қўлга олганидан бир ҳафта ўтмай.

Шу куни кечқурун АҚШ президенти Доналд Трамп Fox News телеканалига берган интервюсида амалдаги президент вазифасини бажарувчи Делси Родригес ҳукуматини мақтади ва шундай деди: «Улар ажойиб... Улар биз истаган ҳамма нарсани берди».

Венесуэла миллий ассамблеяси раҳбари, президент вазифасини бажарувчининг укаси Хорхе Родригеснинг айтишича, ҳукумат «кўп сонли» одамларни озод қилишади.

«Буни Венесуэла ҳукуматининг умуман олганда тинчликка эришишга қаратилган ишораси деб ҳисобланг», деди Хорхе Родригес.

АҚШ ҳукумати ва Венесуэла мухолифати узоқ вақтдан бери қамоқдаги сиёсатчилар, танқидчилар ва фуқаролик жамияти аъзоларини, жумладан, чет эл фуқароларини озод қилишни талаб этиб келади.

Кимлар озодликка чиқди?

Маҳбуслар озод этилиши эълон қилингач, уларнинг оила аъзолари бутун мамлакат бўйлаб қамоқхоналарга югурди.

Озод қилинганлар орасида 2024 йилда тинчлик бўйича Нобел мукофоти совриндори Мария Корина Мачадонинг президентлик кампаниясида иштирок этган мухолифат етакчиси Бяджо Пилери ҳам бор эди.

Шунингдек, сайлов органининг собиқ вакили, 2024 йилги президентлик сайловига номзод Энрике Маркес ҳам озодликка чиқарилди.

Ижтимоий тармоқларда журналистлар томонидан эълон қилинган видеоларда Маркес ва Пилерининг қамоқхона яқинидаги кўчаларда одамлар билан қучоқлашаётганини кўриш мумкин.

Куннинг иккинчи ярмида, шунингдек, беш нафар Испания фуқароси, жумладан, таниқли венесуэлалик-испан адвокати ва ҳуқуқ ҳимоячиси Росио Сан-Мигел озод қилинди.

Венесуэла ҳукумати одатда кескинлик даврида мулоқотга тайёрлигини кўрсатиш учун сиёсий маҳбусларни озод қилади. Бироқ Каракас шу вақтгача сиёсий сабабларга кўра маҳбусларни сақламаслигини таъкидлаб келган.