Трамп: нефт компаниялари Венесуэлага 100 млрд доллар сармоя киритади

Reuters агентлиги хабар қилишича, АҚШ президенти Доналд Трамп жума куни, 9 январда Оқ уйда йирик энергетика компаниялари раҳбарлари билан Венесуэла нефт саноатини тиклаш масаласини муҳокама қилиш учун учрашди. Музокаралар олдидан Трамп ўзининг Truth Social ижтимоий тармоғида Венесуэланинг нефт секторига камида 100 млрд доллар сармоя киритиш нияти борлигини эълон қилди.

Режага кўра, маблағларни компанияларнинг ўзи киритади. Трампнинг айтишича, Венесуэла нефт бозорига чиқиш бўйича музокараларни фақат АҚШ ҳукумати олиб боради. “Сиз биз билан тўғридан тўғри музокара қиласиз, сиз умуман Венесуэла билан музокара қилмайсиз, биз сиз Венесуэла билан музокара қилишингизни истамаймиз”, — деди республикачилар вакили компания раҳбарлари билан учрашувда.

AFP агентлиги маълумотларига кўра, масалани муҳокама қилиш учун Оқ уйга Chevron, Exxon, Conoco Phillips, Continental, Halliburton, HKN, Valero, Marathon, Shell, Trafigura, Vitol Americas, Repsol, Eni, Aspect Holdings, Tallgrass, Raisa Energy ва Hilcorp компаниялари вакиллари келган. Учрашувда, шунингдек, АҚШ давлат котиби Марко Рубио ва энергетика вазири Крис Райт ҳам қатнашган.

Chevron — Венесуэлада ишлаш учун лицензияга эга бўлган ягона хусусий нефт қазиб олувчи компания. Chevron директорлар кенгаши раисининг ўринбосари Марк Нелсон Оқ уйдаги музокараларда компания мамлакат нефт секторига сармоя киритишга содиқ эканини билдирди. Бироқ Reuters маълумотига кўра, йирик нефт компаниялари ҳозирча катта харажатлар ва сиёсий беқарорлик сабабли Венесуэлада узоқ муддатли инвестиция қилишга журъат этмаяпти.

Венесуэла раҳбари Николас Мадуро ҳокимиятдан ағдарилганидан кейин АҚШ президенти Доналд Трамп амалда мамлакатни энди Вашингтон “бошқаради”, деб баёнот берган. 6 январ куни Трамп Венесуэланинг вақтинча ҳокимияти АҚШга 50 млн баррелгача нефт (бозор қиймати тахминан 2,8 млрд доллар) топширишини маълум қилди. Оқ уй раҳбари бу нефт сотувини “шахсан назорат қилиши”ни, шу орқали “даромадлар Венесуэла ва АҚШ халқлари манфаати учун ишлатилишини кафолатлаш”ни ваъда қилди.

Энергетика вазири Крис Райт 7 январ куни АҚШ Венесуэлага нисбатан денгиз блокадасини бекор қилишини, аммо унинг нефт экспорти устидан назорат ўрнатишни режалаштираётганини айтди. Унинг сўзларига кўра, сотувдан даромадлар Вашингтон назоратидаги ҳисобларга тушади ва кейин Венесуэла иқтисодиётини тиклашга йўналтирилади. Райтнинг маълум қилишича, аввал АҚШ Венесуэла омборларида сақланаётган нефтни сотади, кейин эса “номаълум муддат” давомида мамлакатда қазиб олинаётган нефтни ҳам сотишда давом этади.