АҚШ президенти Доналд Трамп ижтимоий тармоқдаги саҳифасида агар Куба зудлик билан «келишув тузмаса» бунинг оқибатлари бўлишини айтиб таҳдид қилди ҳамда энди Кубага Венесуэладан пул ва нефт оқими тўхташини маълум қилди.
«Куба кўп йиллар давомида Венесуэладан катта миқдордаги нефт ва пул келиши эвазига яшаган. Бунга жавобан Куба Венесуэланинг сўнгги икки диктаторига „қўриқлаш хизматлари“ни кўрсатди. Аммо энди бундай бўлмайди!» – деб ёзди Трамп якшанба куни ўзининг Truth Social тармоғида.
«Энди Кубада нефт ҳам, пул ҳам бўлмайди – нол! Мен уларга кеч бўлмасидан битим тузишни маслаҳат бераман», – деб давом этган Трамп.
У айнан қандай келишувни назарда тутгани ва Куба учун қандай оқибатлар бўлиши мумкинлигига аниқлик киритмаган.
Мутахассисларнинг баҳоларига кўра, Венесуэла ўз иттифоқчиси Кубага кунига 35000 баррел (4,8 минг тонна атрофида) нефт етказиб беради.
АҚШ ҳарбийлари 3 январ кунига ўтар кечаси Каракасда ўтказилган рейд давомида Венесуэла раҳбари Николас Мадурони қўлга олиб, Ню Йоркка олиб кетганди. У ерда собиқ президент гиёҳванд моддалар савдоси бўйича айбланиб, судга тортилган.
Трамп ўз постида ушбу рейд ҳақида эслаб ўтган ва Мадурони қўриқлаган кубаликларнинг аксари ўлдирилгани ва энди Венесуэла кубаликлар хизматларига эҳтиёж сезмаслигини билдирган. «Энди Венесуэлада Америка Қўшма Штатлари бор, уни ҳимоя қиладиган энг катта армия (катта фарқ билан) бор», – деган Трамп.
Кубаликлар кўп йиллар мобайнида Николас Мадуронинг шахсий қўриқлаш хизмати таркибида бўлишган. Куба ҳукумати америкалик ҳарбийлар рейди вақтида 32 нафар кубалик ҳалок бўлганини тасдиқлаган.
Куба президенти Мигел Диас-Канел бу 32 «жасур кубалик жангчилар» «империя формасидаги террорчилар» билан жангга киришиб, ҳалок бўлганини айтган.
Куба ҳукумати реакцияси
Мигел Диас-Канел Трампнинг сўзларига кескин муносабат билдирди. «Куба – эркин, мустақил ва суверен мамлакат. Бизга ҳеч ким нима қилишни буюрмайди», – деб ёзди Лотин Америкаси давлати раҳбари X ижтимоий тармоғида.
«Ҳамма нарсани бизнесга, ҳатто инсон ҳаётини ҳам товарга айлантирадиганлар Кубага кўрсатма бериш ҳуқуқига эга эмас. Мамлакатдаги оғир иқтисодий вазият АҚШ бизга (Кубага – таҳр.) олтмиш йилдан бери қўллаб келаётган қаттиқ изоляция чоралари натижаси бўлиб, уларни янада кучайтириш билан ҳам таҳдид қилишмоқда», – дея қўшимча қилди у.
Куба ташқи ишлар вазири Бруно Родригес «Куба ҳеч қайси мамлакатга кўрсатган хавфсизлик хизматлари учун пул ёки моддий мукофот олмагани»ни айтиб чиқди.
