АҚШ Конгрессига Гренландияни қўшиб олиш тўғрисидаги қонун лойиҳаси киритилди

Республикачилар партиясидан АҚШ Вакиллар палатаси аъзоси Ренди Файн конгрессда Гренландияни аннексия қилиш ва оролга Америка штати мақомини беришни назарда тутувчи қонун лойиҳасини илгари сурди. Бу ҳақда конгрессменнинг расмий сайтидаги пресс-релизда айтилади.

Ҳужжатга тушунтириш хатида таъкидланишича, Қўшма Штатлар ўз стратегик манфаатларини ҳимоя қилиш учун чоралар кўриши керак. Ташаббус муаллифининг фикрича, Гренландия устидан тўлиқ назорат ўрнатиш, айниқса, Арктикада таъсир учун кураш кучайган бир пайтда, АҚШнинг миллий хавфсизлиги масаласидир.

«Гренландия Қўшма Штатлар хавфсизлиги учун муҳим аҳамиятга эга. Биз Арктика минтақасида ўсиб бораётган таҳдидларни эътиборсиз қолдира олмаймиз ва унинг ривожланиши Америка манфаатларига мос келишини таъминлаш учун қатъий ҳаракат қилишимиз керак», дейилади хабарда.

Қонун лойиҳаси, шунингдек, АҚШ президенти Доналд Трампга орол устидан назорат ўрнатиш учун «ҳар қандай зарур чораларни» кўриш ваколатини беришни таклиф қилмоқда.

Таҳлилчиларнинг фикрича, вазиятнинг кескинлашуви 2026 йил 3 январда АҚШ Венесуэлада ўтказган махсус операцияси билан боғлиқ бўлиб, бу Трамп маъмуриятининг янада қатъий ташқи сиёсат олиб боришга бўлган ишончини оширган.

9 январ куни Трамп нефт-газ саноати раҳбарлари билан учрашувда Америка Гренландияни «яхши ёки ёмон» усулда барибир олишини айтди. Ўз навбатида, Оқ уй матбуот котиби Кэролайн Левитт маъмурият «АҚШ манфаатларини ҳимоя қилиш» учун «барча вариантларни, жумладан, ҳарбий куч ишлатиш имкониятини кўриб чиқаётганини» тасдиқлади.

Гренландия - Дания Қироллиги таркибидаги автоном ҳудуд, кенг ички мустақилликка эга, аммо мутлақ мустақиллик ҳақида тобора кўпроқ гапирмоқда.

Дания Гренландия устидан суверенитетни сақлаб қолмоқда ва ташқи сиёсат ва мудофаа учун жавобгардир. Шунингдек, Гренландия ҳеч қачон АҚШга берилмаслигини таъкидлаб келмоқда.