Ўзбекистон U23 Осиё Кубоги чоракфиналида Хитой билан ўйнайди

Саудия Арабистонида 23 ёшгача бўлган футболчилардан иборат терма жамоалар ўртасида Осиё Кубоги гуруҳ босқичи якунланди.

А гуруҳидан Ветнам ва Иордания, В гуруҳидан Япония ва БАА, С гуруҳидан Ўзбекистон ва Жанубий Корея, Д гуруҳидан Австралия ва Хитой чоракфиналга чиқди.

Шундан сўнг, чоракфинал жуфтликлари қуйидагича шаклланди:

16 январ,

1) Ветнам – БАА,

2) Япония – Иордания

17 январ,

3) Ўзбекистон – Хитой,

4) Австралия – Жанубий Корея

Ўзбекистон U23 рақиби бўлган Хитой ёшлар терма жамоаси гуруҳ босқичида Австралияни (1:0) мағлуб этиб, Ироқ (0:0) ва Таиланд (0:0) билан дуранг ўйнаган.

Яримфинал ўйинлари 20 январ куни ўтказилади, унда 1- ва 3- жуфтлик ғолиблари, 2- ва 4- жуфтлик ғолиблари тўқнаш келади.

U23 Осиё Кубоги бу йилги мавсумининг бошқаларидан фарқли жиҳати шундаки, унда Олимпиада йўлланмаси ўйналмайди. Шу сабабли, кўплаб жамоалар асосий таркиб билан иштирок этмаяпти.

U23 Осиё Кубоги 2013 йилдан бери ўтказилади. Унда Япония ёшлари энг кўп – 2 марта ғолиб чиққан, шу жумладан сўнгги турнирда ҳам. Шунингдек, Ироқ, Ўзбекистон, Жанубий Корея ва Саудия Арабистони ҳисобида биттадан ғалаба бор.