Туман (шаҳар) ва вилоят судларига раис лавозими керакми?

Туман (шаҳар) ёки вилоят судининг раиси судяни ишга олишга ёки уни интизомий жазолашга ваколатли эмас. Ишлар электрон тарзда тақсимланади. Судянинг интизоми устидан назорат Судялар олий кенгаши ва судялар малака ҳайъатида. Судларни моддий таъминловчи алоҳида департамент ҳам бор.

Судга таъсир одатда айрим мансабдор шахслар томонидан ўша суд раисига чиқиш орқали бўлади. Суд раиси кўпинча туманнинг ёки вилоят бўлса, вилоят раҳбарлари билан бирга бўлади, бирга тадбирларда қатнашади. Ва у орада ижобий яқинлашув, "юздан ўтолмаслик", ўзаро ҳурмат муносабатлари шаклланади. Табиийки, бунда ўзидан бевосита юқорида турувчи раисга бўйсунадиган судяга таъсир бўлиши мумкин. Шундай экан туман (шаҳар), Тошкент шаҳри ва вилоятлар судларига рaис лавозими қанчалик керак? Kun.uz'нинг судлар мустақиллиги ҳақидаги суҳбатида шу масала ҳам муҳокама қилинди.

{Yii::t(}

Ўтказиб юбориш 6s

Ўтказиб юбориш

Яқинда жуда кўп миқдорда ўзганинг мулкини фирибгарлик йўли билан қўлга киритиш, безорилик, қасддан баданга оғир шикаст етказиш жиноятларини содир этгани юзасидан жиноят ишлари бўйича Мирзо Улуғбек тумани суди ҳукми билан 8 йил 1 ой муддатга озодликдан маҳрум қилинган Акмал Шукуров апелляцияда озодликка чиқариб юборилгани танқидларга сабаб бўлганди.

Жамоатчиликнинг кенг муҳокамасидан сўнг, жиноят иши Тошкент шаҳар прокуратураси томонидан киритилган протест асосида тафтиш инстанциясида қайта кўриб чиқилган ва Акмал Шукуровга 6 йил муддатга озодликдан маҳрум қилиш жазоси тайинланиб, у қамоққа қайтарилганди.

Шукуров биринчи инстанция ҳукмидан норози бўлиб, судга қилган апелляция шикояти апелляция инстанциясининг судялари Одилбек Илҳомжонов, Мирзиёд Абидов ва Муҳтарама Турғунова томонидан кўриб чиқилган. Биринчи инстанция судининг ҳукмини ўзгартириш, унга нисбатан Жиноят кодексининг 57-моддасини қўллаб, 3 йил озодликдан маҳрум қилиш жазосига алмаштириш тўғрисидаги хулосага келишган.

Бироқ, Тошкент шаҳар суди раиси ўринбосари Муроджон Мирзажонов мансаб мавқейидан фойдаланиб, иш ҳар томонлама, тўла ва холисона кўрилишига тўсқинлик қилган, суд ишларига аралашиб, судяларга қонунга хилоф равишда таъсир ўтказиши оқибатида, судялар унинг топшириғи ноқонуний эканини олдиндан била туриб, одил судловни амалга ошириш ва қарор қабул қилишда мустақил бўлсалар-да, жавобгарликнинг муқаррарлиги принципига амал қилмасдан, биринчи инстанция судининг ҳукмини ўзгартириб, Жиноят кодексининг 57-моддасини қўллаб, қамоқ эҳтиёт чорасини бекор қилган ҳолда, жазони узил-кесил 3 йил 3 ой муддатга озодликни чеклашга алмаштириб, уни суд залидан қамоқдан озод этиб, оғир оқибатларга сабаб бўлган ноқонуний ва адолатсиз ажрим чиқаришган.

Бу ҳолат судга таъсир одатда айрим мансабдор шахслар томонидан ўша суд раисига чиқиш орқали бўлишини яна бир бор исботлайди. Жиноят ишлари бўйича судя Сарвар Мамадиев Kun.uz'га берган интервюсида бу фикрга қўшилмаслигини, айнан ташкилий масалаларда туман ва шаҳар суд раислари судяларга ёрдам қилишини билдирди.

“Суд иккита йўналишда ишлайди. Биринчидан, ташкилий масалалари бор, иккинчидан, процессуал масалалари бор. Процессуал масалаларда судя мустақил. Ташкилий масалаларда ишга келиб-кетиш, одоб-ахлоқ қоидаларига риоя қилиш, судялик мақомида ўзини тўғри тутиши, бу ҳолатларда назорат амалга оширилади. Лекин айнан кўрилаётган иш юзасидан уни назорат қилишга ҳаққимиз йўқ.

Суд назорати бор тушунча. Бу қандай йўл билан амалга оширилади? Тарафлардан келиб тушган шикоят ёки протест асосида суд ҳукмларни назорат қилади. Фақат бу ҳам процессуал тартибда. Бу шикоят ёки протест бўлмайдиган бўлса, уни ўзидан ўзи келиб, мана бу ишинг бўйича менга тушунтириш бер, дейишга ҳақли эмас, қонунда тақиқлаб қўйилган.

Лекин яна бир такрор айтаман, албатта бир ташкилот бўлгандан кейин у ташкилотда албатта раҳбар бўлиши керак. Бу ерда фақатгина процессуал масалалар эмас, ташкилий масалалар ҳал этилади: бино, у ерга одамларнинг келиб-кетиши, фуқароларнинг мурожаати масаласи. Судя ўзи кўраётган иш бўйича қандайдир норозилик бўлиб, фуқаро мурожаат қиламан деса, ўша судя билан ҳали қарор қабул қилинмасдан туриб гаплашишга ҳаққи йўқ.

Ёки, масалан, кўрилаётган иш бўйича интервю беришга ҳаққи йўқ. Бу ҳолатларда ўша раис ҳолатни мувозанатда ушлаб туради ва фуқаролардан келаётган мурожаатлар, судяни қийнаётган ташкилий масалалар, мисол учун ўша бинонинг ҳозир бўлиши, бинода ҳамма иштирокчиларга шароит тенг яратилган бўлиши, судяларнинг ўзининг ўша ташкилий масалалардаги компьютери, унинг қоғози, ҳар бир ҳолатини судя ўзи ташкил қилмайди. Демак, суднинг раиси ва ўша раҳбарият мана шу масалаларни тўлдириб туради”, – деди судя.

Унинг қўшимча қилишича, раислик лавозимлари бундан кейин тайинланмайди, судялар орасида овоз бериш йўли билан сайланади. “Бунда демак давлат ҳам ва ўша судялар ҳамжамияти ҳам масаланинг оғриқли жойлари борлигини сезди ва бу масалани ҳал қилишга қаратилган қарорлар қабул қилинди”, – дея биринчи саволга жавобини якунлайди Мамадиев.

“Туман, вилоят даражасидан кўра, Олий судда ишлар адолатлироқ кўрилади” – адвокат

Жаҳонгир Муталибовга кўра бугунги кунда кўплаб адвокатлар суд чиқарган қарорлари билан келишмайди. Уларнинг фикрича, туман ва шаҳар суд раисларининг ҳукмларга таъсири йўқ эмас, бор. Муталибов буни тушуниш мумкин бўлган ҳолат сифатида тасвирлаган.

“Шу ҳолатларда эшитганмиз ҳам, “раис билан маслаҳат қиламиз” деган жойлари бор. Ҳозир унақа гаплар камайиб қолди, авваллари кўп эди. Судялар устидан жамоатчилик назорати ҳам, оммавий ахборот воситалари ҳам у даражада кучли эмас эди, шу пайтда албатта бундан фойдаланишарди. Энди раис деган номи бор, қайси ташкилотга борсангиз ҳам раҳбар — раҳбар-да. Энди раҳбар ҳам ўзининг қўл остидаги ходимнинг барибир бўйсунишини хоҳлайди, айтганини қилишини хоҳлайди. Раиснинг ҳам танишлари бор, унга ҳам ўзига яраша босим ўтказилади. Шу ҳолатда табиийки, у ўз қўл остидаги судяни чақириб, унга босим қилиб “мана шундай қарор чиқарасан” демаса ҳам, ўзининг вазиятини тушунтиради ёки ишда келиб чиқиши мумкин бўлган муаммоли ҳолат юзага келишини тушунтиради. Шу орқали барибир таъсир қилади. Бу нарсанинг мутлақо таъсири йўқ деб айта олмайман”, – дейди у.

Адвокатнинг фикрича, қуйи инстанциялардан кўра, Олий судда ўтадиган жараёнлар адолатли ва қонунийроқ бўлади.

“Мен ҳар доим айтаман, туман, вилоят даражасидан кўра Олий судда ишлар, адолатлироқ, қонунийроқ кўрилади, менинг наздимда. Шунақа туман суди даражасида ёки вилоят суди даражасида иш кўрилаётган бўлса, баъзида очиқ-ойдин айтамиз. Мен айрим вилоятларни ҳам, мисол учун, биламан, амалиёти ҳар хил. Қайсидир вилоят оғирроқ амалиёт билан ҳукм чиқарса, қайсидир вилоят бошқача, бир хил амалиётнинг ўзи йўқ. Шундан келиб чиқиб, адвокатлар кўпчилиги вилоятда ишнинг, айтайлик, қонуний, асосли, яъни адвокат ўзи келтирган далиллар асосида бўлишини тахмин қила оладиган даражага чиқдик. Шунинг учун мен кўп одамга айтаман, Олий судгача етиб бориш эҳтимолингиз бор. Чунки Олий судда барибир энди туман судясига бўлаётган босим билан Олий суд судясига босим унақа бўлмайди. Олий суд судяси катта лавозимдаги одам. Унга етиб боришнинг ўзи осон эмас, шунинг учун у ер босимлардан холироқ ҳудуд деб ҳисоблайман. Лекин туман – энг кўп босим остида қоладиган жой барибир”, – деди у.

Таъкидланишича, судяга нафақат раислари, балки бошқа раҳбарлар, дейлик туман прокурори, ички ишлар бўлими бошлиғи, Давлат хавфсизлик хизмати вакилларининг ҳам таъсири кучли.

“Маъмурий ричаг қаердадир бор” – инсон ҳуқуқлари фаоли

Абдураҳмон Ташанов эса бу рўйхатга ҳокимларни ҳам қўшиб, тажрибасидан мисоллар келтира бошлади. Суҳбатдошларни эса буни очиқ тан олишга, вазиятни силлиқламасликка чақирди.

“Судларга нисбатан ўша маъмурий ричаглар борлиги бўйича сиз гап бошладингизми, демак, муаммо бор. Бекорга бу гапни бошлаётганингиз йўқ. Мен ҳамкасб сифатида кўнглингиздаги гапларни билиб ўтирибман ва буни ҳозир текислаб, силлиқлаб гапиришнинг ҳам ҳожати йўқ, тўғридан тўғри тан олайлик. Бу бор нарса. Ўтган куни битта гап бўлди, қайсидир вилоятга биттасини суд раиси қилиб юбормоқчи бўлишди-ю, у “мен у ерга бора олмайман, чунки ҳоким ёмон”, деди. Бундай олиб қарасангиз, ҳокимга нима дахли бор суднинг? “Ёмон ҳоким билан келиша олмайман мен у ерда”, деган, масалан, суд раҳбарларидан биттасининг ўртасида шунақанги гап бўлибди. Бу гап етиб келди.

Ва биз буни жуда яхши биламиз. Масалан, маъмурий ричаг қаердадир бор, раис сўзи бор ёки унинг ўринбосарлари деган сўз бор, демак, ўша жойда қанақадир даражада озгина коррупциялашган ёки бўлмаса, маълум даражада носоғлом муҳит бор. Айниқса Ўзбекистонда буни қатор мисолларда кўрамиз, ижтимоий тармоқларда деярли ҳар куни ўқиймиз. Албатта, судлар бундан холи эмас”, – дейди у.

Ташанов интервюда судяларнинг ҳаёти суғурталаниши масаласини кўтарди. “Судлар тўғрисида”ги қонуннинг 76-моддасига кўра, судялар ва уларнинг оила аъзоларини ижтимоий ҳимоя қилиш чоралари белгиланган. Аммо суҳбатдош бу амалда етарлича ишламаётганини тушунтиришга уринди.

“Мана, битта мисол тариқасида айтиб кетай. Яқинда олий суд раҳбарларидан бирининг қабулида бўлдим. Биз судялардан бирининг ҳаёти суғурталанганлиги, суғурта пулини ундириш бўйича қатнашдик. Шунинг суғурта пули оиласига ажратилмади. Олий судгача борди. Олий судда кейин охири ўша раҳбарлардан бири менга айтяптики, “сизлар шу масалани кўтаринглар, судяларнинг ҳаёти суғурталанган бўлсин, ўша қонунни мукаммаллаштириш керак. Чунки ҳозирги мавжуд қонунда гўёки фақат фавқулодда бошига [ҳолат] тушса, суғурта пули тўланади, акс ҳолларда тўланмайди”, деган нарсани.

Кейин мен айтдимки, биз қандай қилиб кўтарамиз? Масалан, Олий суднинг ўзида қонунчилик ташаббуси бор. У чиқиб, шуни нимадир қилиши мумкин. Яъни ҳаёт суғурталанганлиги судяга ишонч беради, яъни у эртасини кўп ўйламайди. Эртага бирор нарса бўлиб қолса ҳам хотиржамлик бўлади. Демак, судяларнинг ўзи ҳимояланмаган бўлса… Бунинг ҳаммаси ҳаётдан олинади. Бу нарсалар ҳаётимизда бор.

Масалан, биз буни ҳозир авайлаб гапирамизми, қаттиқроқ гапирамизми, ундан қатъи назар ўша ижтимоий тармоқлар, бошқалар буни кўрсатиб турибди. Энди қонун бор-ку, нима керак масалан суд раислари ёки бўлмаса бунақанги ортиқча маъмурий механизмлар нима керак десангиз, Сарвар аканинг гапига тўқнаш келасиз. Яъни суд бўладими, бошқа идоралар бўладими, ҳамма жойда ташкилий фаолият билан боғлиқ масалалар бор. Балки буни умуман судлар тизимида техник жиҳатдан тартибга солиш бўйича департамент ҳам бор, тўғридан тўғри ўшанга юклатиб ҳам қўйиш мумкин”, – дейди Ташанов.

У сўзининг сўнгида электрон тақсимланадиган суд ишлари тасодифийлик тамойилига асосан берилишини шубҳа остига олиб, айрим “дело”лар тегишли судяларга ажратилишини гапириб ўтди.

Суҳбатнинг тўлиқ шаклини юқоридаги ҳавола орқали томоша қилишингиз мумкин.