Танқиддан сўнг: тафтиш инстанцияси ажрими билан Акмал Шукуров қамоққа қайтарилди

Безорилиги учун 8 йилга қамалган ва апелляция суди томонидан озодликка чиқариб юборилган Акмал Шукуровга оид жиноят иши тафтиш инстанциясида қайта кўриб чиқилди. Бу ҳақда Олий суд матбуот котиби Азиз Абидов хабар берди.

Маълум қилинишича, Тошкент шаҳар прокуратураси тафтиш тартибида протест киритиб, А.Шукуровга нисбатан апелляция суди томонидан 2025 йил 9 декабрда чиқарилган ажримни бекор қилишни сўраган.

Протестда ЖИБ Мирзо Улуғбек туман судининг ҳукмини ўзгартириб, Жиноят кодексининг 168-моддаси (фирибгарлик) 4-қисми “а” банди билан тайинланган жазони ўзгартириш ҳамда 104-моддаси (қасддан баданга оғир шикаст етказиш) 2-қисми “е” банди ва 277-моддаси (безорилик) 3-қисми “г” банди билан тайинланган озодликдан маҳрум қилиш жазосини ўзгаришсиз қолдириш сўралган.

 Жиноят иши Тошкент шаҳар судининг 3 нафар судядан иборат тафтиш ҳайъати томонидан қайта кўриб чиқилиб, прокуратура протести қаноатлантирилган. Эълон қилинган ажримга кўра биринчи инстанция судининг ҳукми ўзгартирилган ҳамда апелляция инстанция судининг ажрими бекор қилинган.

Акмал Шукуровга Жиноят кодексининг 168-моддаси 4-қисми “а” банди билан жиноят доирасида етказилган моддий зарарнинг ўрни қопланганлиги сабабли ушбу кодекснинг 57-моддасини қўллаган ҳолда иш ҳақининг 20 фоизини давлат даромадига ушлаб қолган ҳолда 3 йил муддатга ахлоқ тузатиш ишлари жазоси тайинланган. Жиноят кодексининг 104-моддаси 2-қисми “е” банди билан тайинланган 5 йил муддатга озодликдан маҳрум қилиш жазоси ҳамда 277-моддаси 3-қисми “г” банди билан тайинланган 3 йил муддатга озодликдан маҳрум қилиш жазоси аслича қолдирилиши белгиланган.

Шу тариқа, тайинланган жазоларни қисман қўшиш йўли билан Акмал Шукуровга 6 йил муддатга озодликдан маҳрум қилиш жазоси тайинланган. Унинг қамоқда сақланган кунлари тайинланган жазодан чегирилиб, ўташ учун 5 йил 3 ой 12 кун муддатга озодликдан маҳрум қилиш жазоси қолдирилган. 

Тошкент шаҳар судининг ушбу ажрими устидан тарафлар қонунда белгиланган тартиб ва муддатда Олий суднинг жиноят ишлари бўйича судлов ҳайъатига тафтиш тартибида шикоят бериш ва протест келтиришга ҳақлилиги маълум қилинган.

Акмал Шукуров иши 

Акмал Шукуров 2025 йил 16 март куни тунда Яккасарой туманидаги “The Tower” меҳмонхонаси ёнида ресторандан чиққан аёлга тегажоғлик қилган. Аёлнинг турмуш ўртоғи хотинининг шаънини ҳимоя қилганида Акмал Шукуров эркак ва аёлга, шунингдек, воқеа жойида бўлган яна бир эркакка зарба берган. Бунинг оқибатида улар енгил тан жароҳати олишган. 

Бундан ташқари, Акмал Шукуров ўша куни “The Tower” меҳмонхонаси ёнида унинг безорилик ҳаракатларига чек қўймоқчи бўлган фуқаронинг юзига мушт тушириб, унга ҳаёт учун хавфли бўлган оғир тан жароҳати етказган. Бунинг оқибатида 35 ёшли эркак бош мия жароҳати, ўнг юзидан лунжи йиртилган жароҳати ва спиртдан заҳарланиш ташхиси билан шифохонага ётқизилган. Яқинлари унда тезкор равишда 5 соатлик мия трепанацияси операцияси ўтказилганини, сўнгра сунъий комага туширилганини айтган.

Воқеа жойидан қочиб яширинган Акмал Шукуров кўп ўтмай Қозоғистонда қўлга олинган ва Ўзбекистонга экстрадиция қилинганди.

Жиноят ишлари бўйича Мирзо Улуғбек туман судининг 2025 йил 24 октябрдаги ҳукмига кўра, Акмал Шукуровга жуда кўп миқдорда фирибгарлик, безорилик ҳамда безорилик оқибатида қасддан баданга оғир шикаст етказиш жиноятларини содир қилганликда айбли деб топилган. Унга 8 йил 1 ой муддатга озодликдан маҳрум қилиш жазоси тайинланганди. 

Тошкент шаҳар суди жиноят ишлари бўйича апелляция инстанцияси судининг 9 декабрдаги ажрими билан эса 8 йил 1 ой озодликдан маҳрум қилиш жазоси 4 йил 1 ой муддатга озодликни чеклаш жазосига ўзгартирилиб, Акмал Шукуров дарҳол суд залидан қамоқдан озод қилинган эди.