Трамп Давосда: Европа нотўғри йўлдан кетмоқда

Шу билан бирга, у Европа давлатларидаги оммавий иммиграцияга ишора қилди ва қайта тикланувчи энергия манбаларига ўтишни нотўғри йўл деб атади. “Мен энди уни танимай қолдим”, — деди у Европа ҳақида гапирар экан.

Америка етакчиси сўнгги ўн йилликларда АҚШ ва Европада давлат харажатлари ошиб боргани ҳамда четдан импорт кўпайганини ҳам танқид қилди. Трампнинг фикрича, Жо Байденнинг олдинги маъмурияти ва кўплаб бошқа ғарб ҳукуматлари “миллатларни бой, қудратли ва кучли қиладиган нарсалардан” юз ўгирган. “Натижада рекорд даражадаги бюджет ва савдо камомадлари, шунингдек инсоният тарихидаги энг катта оммавий миграция тўлқини келиб чиққан, ўсиб бораётган суверен камомад пайдо бўлди”, — деди у.

Трампнинг айтишича, Европа — “радикал сўллар Америкага тиқиштирмоқчи бўлган тақдир”нинг намунасидир. Шу билан бирга, у Германия “2017 йилга нисбатан 22 фоизга кам электр энергияси ишлаб чиқаряпти”, электр нархлари эса “64 фоизга ошган”, деб даъво қилди ва бунга олдинги ҳукуматларни масъул, деб ҳисоблашини билдирди.

Трамп, шунингдек, ўзининг “мамлакати учун вайронкор бўлган энергетик сиёсат”ни тўхтатганини айтди — у бу сиёсат нархларни оширади ва бир вақтнинг ўзида иш ўринлари ҳамда заводларни дунёдаги энг катта ифлослантирувчи давлатларга кўчириб юборади, деб ҳисоблайди.