Зеленский: АҚШнинг Украина учун хавфсизлик кафолатлари 100 фоизга тайёр

Украина президенти Володимир Зеленскийнинг маълум қилишича, АҚШнинг унинг мамлакати учун хавфсизлик кафолатлари тўлиқ келишилган.

“Ҳужжат 100 фоизга тайёр ва биз шерикларимиз уни имзолаш санаси ҳамда жойини тасдиқлашини кутяпмиз”, — деди у якшанба, 25 январ куни Вилнюсда Литва президенти Гитанас Науседа билан учрашувдан кейин ўтказилган матбуот анжуманида.

Украина президентининг қўшимча қилишича, хавфсизлик кафолатлари ҳақидаги ҳужжат кейинчалик АҚШ Конгресси ва Украина Олий радасига ратификация қилиш учун юборилади.

Зеленский шунингдек Абу-Дабидаги уч томонлама музокараларда “20 пунктли режа ва муаммоли масалалар” муҳокама қилинганини айтди. Унинг сўзларига кўра, бундай масалалар “жуда кўп эди, ҳозир эса камайди”.

У Украинанинг Донбасс бўйича позицияси ўзгармаганини таъкидлади: “Биз ўз давлатимиз учун уришяпмиз, ўзимиз учун. Биз бошқа давлат ҳудудида уришмаяпмиз, демак бизга қандай саволлар бўлиши мумкин?” — деди Украина президенти.

Унинг айтишича, Украинадаги вазиятни тинч йўл билан тартибга солишга эришишга уринаётган АҚШ президенти Доналд Трамп маъмурияти Украина ва РФнинг мутлақо турлича принципиал позициялари ўртасида муросани топишга ҳаракат қиляпти.

“Биз уч томонлама форматда мулоқот қилишга боряпмиз. Бу — шундай илк қадамлар, балки айнан ўша муросани топиш учундир. Лекин муроса бўлиши учун барча томонлар муросага тайёр бўлиши керак. Айтганча, Америка томони ҳам”, — дея қўшимча қилди у.

Ўз навбатида Литва президенти Россияни Украинада барқарор ва адолатли тинчликка эришиш бўйича мажбуриятлардан бўйин товлаётганликда айблади. Науседанинг эслатишича, РФ ўт очишни тўхтатиш ҳақидаги чақириқларни ҳам рад этмоқда.

Шу билан бирга, у Украина 2030 йилгача Европа Иттифоқи аъзоси бўлиши керак, деган ишончини билдирди. Украинанинг ЕИга кириши Литванинг стратегик манфаатидир ва бутун минтақада барқарорликка қадам, деб таъкидлади у.

Абу-Дабида 23–24 январ кунлари АҚШ воситачилигида РФ ва Украина вакилларининг Россиянинг Украинага бостириб киришини якунлаш бўйича илк тўғридан тўғри музокаралари бўлиб ўтди. Зеленский уларни ижобий баҳолаб, “конструктив” деб атади. Зеленскийнинг айтишича, муҳокама урушни тугатишнинг эҳтимолий параметрлари ва бунинг учун зарур бўлган Украина хавфсизлик кафолатларига қаратилган. Кейинги раунд 1 феврал куни бўлиб ўтиши керак.

Музокаралар бошланишидан сал олдин Москва Украина армиясини бутун Донбассдан, шу жумладан аввал Россия назоратида бўлмаган ҳудудлардан ҳам чиқариш ҳақидаги ўзининг энг юқори талабини тасдиқлади. Украина буни қатъий рад этади.

Музокараларнинг биринчи кунидан кейин РФ Украинага қарши яна бир йирик кўламли ракета-дрон ҳужумини амалга оширди. Киевда эса Россия ракеталари, жумладан, тинчлик жараёнига қарши ҳам йўналтирилгани маълум қилинди.