«Эпштейн иши»нинг 5 та муҳим оқибати: нега бу иш ҳали тинчимаслиги ҳақида

Ўтган ҳафта охирида АҚШ Адлия вазирлиги жинсий жиноятлар учун ҳукм қилинган ва қамоқда ўзини ўлдирган молиячи Жеффри Эпштейн иши бўйича миллионлаб янги файлларни эълон қилди.

Бу эса, кутилганидек, кучли сиёсий зўриқиш ва инқирозни пайдо қила бошлади. Бу иш шу қадар кучли резонанс келтириб чиқардики, ҳатто АҚШнинг Эронга эҳтимолий ҳужуми ҳам, Россия ва Украина ўртасидаги уруш ҳам жамоатчилик эътиборидан четда қолмоқда. Ҳозирча ҳамма «Эпштейн файллари»ни муҳокама қилмоқда…

Интернетда бу мавзуда ахборот жуда кўпайиб бормоқда. Қуйида «Эпштейн файллари»нинг энг муҳим бешта оқибати ҳақида фикр юритилади.

Биринчи эффект – президент Трамп ва унинг маъмурияти учун бўлади. Трамп 2024 йилги сайлов кампанияси давомида «Эпштейн файллари»ни кўп тилга олган ва Байденни обрўсизлантириш учун бу мавзудан фойдаланганди.

Ўзи ҳокимиятга келганидан кейин эса деярли бир йил давомида ушбу файллар очиқланишига қаршилик кўрсатди. Конгрессда файлларни эълон қилиш тарафдорлари кўпайиб, республикачилар ҳам шуни талаб қила бошлаганидан кейингина унинг риторикаси ўзгарди ва якунда у тегишли қонунни имзолашга мажбур бўлди.

Охирги ойларда Трампнинг рейтинги жиддий даражада пасайди. Бунинг сабаблари кўп. Лекин асосий сабаб – «Эпштейн файллари»да Трамп ва унинг сафдошларининг номлари жуда кўп бор тилга олингани бўлмоқда.

Трамп кўп йиллар Жеффри Эпштейн билан яқин дўст ва ҳамкор бўлгани очиқланди. Натижада америкаликларда Трампга ишончсизлик кучайди.

Иккинчи оқибат – ғарб жамоатчилигининг элитага бўлган ишончсизлиги жиддий даражада ошиб бориши. Бугунги кунда америкаликларнинг ярмидан ортиғи «агар бой ва қудратли бўлсангиз – ҳар қандай жиноятни ёпишади», «Эпштейн элитанинг, элита Эпштейннинг орқасини ёпмоқда», «Эпштейн ўзини ўзи ўлдирмаган, унга ёрдам беришди – бошқаларнинг сирини сақлаш учун…» деган қарашлар кўпайган.

Сўнгги йилларда шусиз ҳам ғарб жамиятларида элита қатламга бўлган ишонч пасайиб, ултраўнг ва ашаддий сўл кучларга мойиллик ортиб бораётганди. «Эпштейн файллари» оддий одамларнинг элитага бўлган ишончини янада синдиради, бунинг оқибатлари эса анча жиддий бўлади. Жумладан, ултраўнг кучларнинг ҳокимиятга келиши тезлашади.

Учинчи оқибати геосиёсий бўлиб, АҚШ ва Исроил алоқаларига таъсир қилиши мумкин. Маълум бўлишича, Жеффри Эпштейн этник яҳудий сифатида Исроил давлатчилиги билан, унинг элитаси ва махсус хизматлари ходимлари билан жуда қалин алоқаларга эга бўлган. Хусусан, Исроил собиқ бош вазири Эҳуд Барак 2013-2017 йиллар оралиғида Эпштейн билан 30 мартага яқин кўришган.

АҚШ жамоатчилиги, айниқса ултраўнг кучлар вакиллари Эпштейн Исроилга ишлаган, ўзи тўплаган компроматларни Исроилга етказиб турган, деб ҳисоблайди. АҚШ жамиятида кенг тарқалган фаразга кўра, Трамп шунинг учун Исроилга босим қила олмайди, чунки Эпштейн етказган маълумотлар Исроил томонидан Трампга босим воситаси сифатида ишлатилади…

Тўртинчи оқибат – Россияга бўлган ишончсизлик ва гумонлар ортиши билан боғлиқ. Россиялик мухолифатчилар, украиналик экспертлар ва жумладан Полша бош вазири Доналд Туск «Эпштейн иши» ортида турган, махфий маълумотларга эга бўлган ва бу маълумотлар орқали ғарб етакчиларини шантаж қилувчи давлат – Россия эканини айтмоқда.

Бу қараш тарафдорлари ўз позицияларига Эпштейннинг атрофида доимо асли россиялик, беларуслик қизлар бўлгани, улардан жосус сифатида фойдаланилгани, шунингдек, Эпштейн ўз ўлими олдидан катта бойликларини асли беларуслик қизга васият қилиб қолдиргани каби аргументлар билан асослашади.

Бешинчи ва охирги эффект – бу давлатлар ва цивилизациялар ўртасидаги маънавий юксаклик учун олиб бориладиган курашдаги баҳолар ҳисобланади. Ғарб тарихида, бу биринчи ва охирги маънавий-сиёсий-ҳуқуқий жиноят эмас. Эпштейн иши билан ғарб цивилизациясининг обрўси батамом яксон бўлмайди. Лекин Эпштейн иши ғарб давлатчилиги тизимларига, ғарб элиталарининг глобал майдондаги обрўсига жиддий зарба беради.

Бошқа цивилизациялар, жумладан, мусулмон цивилизацияси, ўзини консерватив ҳисобловчи Россия, Хитой ва Ҳиндистон каби давлат-цивилизацияларнинг ғарбга нисбатан истеҳзо билан муносабатда бўлиши учун қулай имконият пайдо бўлди.

Ҳали Эпштейн иши батамом ўрганилгани йўқ, ҳали кўп можаролар ва хулосалар олдинда. Бироқ, бу иш ғарбдаги институтлар ва маънавий-сиёсий муҳитда жиддий нуқсонлар ва инқирозлар борлигини яққол фош этди.