HUMO миллий тўлов тизими ва ATEC етакчи банкоматлар ишлаб чиқарувчиси ўртасида меморандум имзоланди

ATEC компанияси банкларда ўзига ўзи хизмат кўрсатиш ва молиявий амалиётлар автоматизацияси учун юксак технологик қурилмалар ишлаб чиқариш соҳасида 30 йилдан зиёд тажрибага эга. Унинг маҳсулотлари дунёнинг 15 та мамлакатида, жумладан АҚШ, ЕИ давлатлари, Россия ва Хитойда қўлланади.

Alfabank, Revolut, Halyk Bank ва бошқа кўплаб илғор технологик банклар АТМ тармоқларини қуришда ATEC ечимларидан фойдаланадилар.

Келишув доирасида HUMO ATECнинг Ўзбекистондаги эксклюзив етказиб берувчиси ва расмий сервис марказига айланади.

Ўзбекистонга етказиб берилаётган ресайклинг функциясига эга ATEC банкоматлари хавфсизлик ва ишончлилик бўйича жаҳон стандартларига мувофиқ келади, шунингдек улар HUMO тўлов тизимида сертификациядан ўтган. Илғор функционал, жумладан биометрик идентификация имкониятлари банкларга ўз қурилмалари тармоғининг самарадорлигини ошириш ва мижозларга тақдим этиладиган хизматлар рўйхатини кенгайтириш имконини беради.

Бу ҳамкорлик Ўзбекистон тўлов инфратузилмасини янада мустаҳкамлаш ва технологик ривожлантириш сари муҳим қадамни ифодалайди ва аҳолига жаҳон даражасидаги хизматлардан фойдаланиш имкониятини тақдим этади, нақдсиз тўловлар улушининг ўсишига ва Ўзбекистон молия тармоғининг рақамлашувига хизмат қилади.