АҚШ ўз фуқароларини Эронни зудлик билан тарк этишга чақирди

АҚШнинг Теҳрондаги виртуал элчихонаси яна бир бор америкаликларга Эронни зудлик билан тарк этишни тавсия қилди — Арманистон ёки Туркия орқали қуруқликдан чиқиб кетиш, маҳаллий ёки АҚШ ҳукуматининг ёрдамига боғлиқ бўлмаган режа тузиш кераклиги айтилди.

Фото: Morteza Nikoubazl/NurPhoto/picture alliance

АҚШ ҳукумат органлари америкаликларни Эрон ҳудудини зудлик билан тарк этишга чақирди. “Дарҳол Эронни тарк этинг. АҚШ ҳукуматининг ёрдамига боғлиқ бўлмаган ҳолда Эрондан чиқиб кетиш режасини ишлаб чиқинг. Парвозлар бекор қилиниши ёки узилишлар олдиндан огоҳлантиришсиз ҳам юз бериши мумкин”, — дейилади АҚШнинг Теҳрондаги виртуал элчихонаси баёнотида.

Дипломатик миссия АҚШ фуқароларига ҳукумат ёрдамига умид қилмасдан мустақил чиқиб кетиш режасини тузишни тавсия қилади — қуруқликдан Арманистон ёки Туркия орқали. Баёнотда интернет ишида узилишлар бўлиши мумкинлиги ҳам қайд этилган.

“Агар сиз мамлакатни тарк эта олмасангиз, уйингизда ёки бошқа хавфсиз бинода хавфсиз жой топинг. Озиқ-овқат, сув, дори-дармон ва бошқа зарур нарсаларни захира қилинг. Намойишлардан йироқ бўлинг, кўзга ташланмасликка ҳаракат қилинг ва атрофга эътиборли бўлинг”, — дея чақирди элчихона. Шунингдек, маҳаллий ОАВни кузатиш ва режаларни заруратга қараб ўзгартиришга тайёр туриш, телефонни доимо қувватланган ҳолда сақлаш, қариндошлар ва дўстлар билан алоқани узмаслик тавсия этилган.

Баёнотда АҚШ Эрон билан дипломатик муносабатларни сақламаслиги, америкаликлар эса бу мамлакатда сўроқ, ҳибсга олиш ва ушлаб туриш хавфи юқори бўлган катта таваккалчиликка дуч келиши таъкидланади. Дипломатлар эслатишича, АҚШ билан алоқадорликни намойиш қилишнинг ўзи ҳам Эрон ҳокимияти томонидан ушлаб кетиш учун етарли сабаб бўлиши мумкин.

Америкаликлар учун шунга ўхшаш огоҳлантиришлар АҚШнинг Теҳрондаги виртуал элчихонаси сайтида 2026 йил 13 январ куни ва 2025 йил 15 июн куни ҳам эълон қилинган.

6 феврал куни Уммонда АҚШ ва Эрон Эроннинг ядровий дастурини тўхтатиш ҳамда баллистик ракеталарни ишлаб чиқишни чеклаш бўйича музокара ўтказиши керак.

Бундан аввал АҚШ президенти Доналд Трамп Эронга босимни кучайтирган ва бир неча бор ҳарбий чоралар билан таҳдид қилган — жумладан, ҳукуматга қарши намойишларни шафқатсиз бостириш билан боғлиқ ҳолда. Январ бошидан бери минтақадаги АҚШ ҳарбий иштироки сезиларли даражада кенгайтирилди, хусусан, Abraham Lincoln авиаташувчиси ва унинг кузатувчи кемалари етиб келди.

Январ охирида Трамп Эрон томон қўшимча ҳарбий кемалар йўл олганини айтди. Шу билан бирга, у “битим тузиш”га умид билдирган. Унинг сўзларига кўра, музокаралар натижасига қараб, Теҳронга нисбатан қандай йўл тутишини ҳал қилади.