«Жанубий Корея - Марказий Осиё» биринчи саммити санаси белгиланди

Тарихий учрашув кузда бўлиб ўтиши режалаштирилган. Саммитда Қозоғистон, Қирғизистон, Ўзбекистон, Туркманистон ва Тожикистон етакчилари иштирок этиши кутилмоқда.

Фото: isrs.uz

Жанубий Корея ва Марказий Осиё давлатлари ўртасидаги илк саммит 2026 йил 16-17 сентябрь кунлари бўлиб ўтади. Бу ҳақда ташқи ишлар вазири Чо Хён Сеулда тадбирни ташкил этиш бўйича тайёргарлик йиғилишида маълум қилди.

Саммитда Қозоғистон, Қирғизистон, Ўзбекистон, Туркманистон ва Тожикистон етакчилари иштирок этиши кутилмоқда.

Чо Хён бўлажак учрашув Жанубий Кореянинг дипломатик уфқини кенгайтириш ва Марказий Осиё давлатлари билан алоқаларни мустаҳкамлашда муҳим қадам бўлишини таъкидлади. Унинг сўзларига кўра, саммит формати икки ва кўп томонлама ҳамкорликни чуқурлаштириш, шунингдек, таъминот занжирларини диверсификация қилиш ва минтақа давлатларида яшовчи корейс этник жамоаларини қўллаб-қувватлаш самарадорлигини ошириш соҳаларида ҳамкорлик қилиш учун асос яратади.