Полша фуқароларини Россияни тарк этишга чақирди

Полша Ташқи ишлар вазирлиги Украинада давом этаётган уруш, шунингдек РФ Полшани расман “дўст бўлмаган” давлат деб эълон қилгани муносабати билан бу мамлакат фуқароларига Россияга ҳар қандай сафарлардан тийилишни тавсия қилди. Душанба куни, 16 февралда ташқи сиёсат идорасининг сайтида эълон қилинган расмий баёнотда ТИВ Россияда бўлиб турган поляк фуқароларига ҳам “шахсий, оилавий ёки касбий ҳолатлар улардан мамлакатда қолишни талаб қиладиган ҳолатлардан ташқари, мавжуд тижорий ва хусусий воситалар орқали Россия ҳудудини тарк этиш”ни маслаҳат берди.

Ҳужжатда таъкидланишича, Россиядаги поляк фуқароларига консуллик ёрдами кўрсатиш имкониятлари борган сари чекланиб бормоқда. Бу Россия ҳокимиятининг Санкт-Петербург ва Калининграддаги Полша бош консулликларини ёпиш ҳақидаги қарорлари билан боғлиқ бўлиб, натижада дипломатик ва консуллик ходимлари сони қисқарган.

“Хавфсизлик вазияти кескин ёмонлашса, чегаралар ёпилса ёки бошқа кутилмаган ҳолатлар юз берса, эвакуация анча қийинлашиши ёки ҳатто умуман мумкин бўлмаслиги мумкин”, — деб огоҳлантирди вазирлик.

Варшава ва Москва 2024 йил кузидан бошлаб консуллик муассасаларини ўзаро ёпишни бошлаган. Улардан сўнггилари — Гданскдаги Россия консуллиги ва Иркутскдаги Полша консуллиги ўтган йил охирида ёпилган. Натижада ҳар икки давлатда ҳам бош консулликлар қолмаган, фақат пойтахтлардаги тегишли элчихоналар ишламоқда.

Икки томонлама муносабатларнинг кескин ёмонлашишига Полшада Украина сўрови билан Россия археологи Александр Бутягиннинг қўлга олиниши ҳам таъсир кўрсатган. У Россия Украинанинг Қрим яриморолини қўшиб олганидан кейин Қримда олиб борган қазишмалари билан боғлиқ ҳолда ушланган.