Қўшимча функционаллар
-
Тунги кўриниш
Зеленский УХХда “тозалаш” ишларини ўтказишни топширди
Володимир Зеленский Украина Хавфсизлик хизмати (УХХ)да қаттиқ “тозалаш” ишлари бошланишини маълум қилди. Бундан олдин идорада кадрлар алмашинуви бўлиб ўтган, шунингдек Ихтисослаштирилган коррупцияга қарши прокуратура УХХнинг юқори лавозимли ходимига нисбатан тергов олиб борилаётганини хабар қилган.
Фото: Sergei Chuzavkov/AFP/Getty Images
Украина президенти Володимир Зеленский Украина Хавфсизлик хизматида “тозалаш” ишлари ўтказилишини эълон қилди. Унинг айтишича, душанба куни, 16 февралда у УХХ раҳбари вазифасини бажарувчи Евгений Хмара ва унинг ўринбосари Александр Покладнинг Россия операцияларига қарши кураш бўйича ҳисоботларини эшитган.
“Александр Поклад Украинага эмас, бошқа манфаатларга хизмат қилаётган шахслардан Украина Хавфсизлик хизматини тозалаш билан ҳам шуғулланади. Қаттиқ чоралар ва ҳақиқатан ҳам кучли Украина Хавфсизлик хизмати керак. Мен натижаларни кутяпман”, — деди Зеленский ўзининг кечки мурожаатида.
16 феврал куни Ихтисослаштирилган коррупцияга қарши прокуратура УХХнинг юқори лавозимли ходимига нисбатан судгача бўлган тергов якунланганини маълум қилди. Расмий хабарда унинг фамилияси ва лавозими кўрсатилмаган, аммо “Украинская правда” маълумотига кўра, гап Иля Витюк ҳақида кетмоқда.
Коррупцияга қарши миллий бюро агентлари билан биргаликда ўтказилган тергов натижаларига кўра, гумонланувчи 2023 йил декабрида 21,6 миллион гривнага квартира сотиб олган ва уни оила аъзосининг номига расмийлаштирган. Шартнома бўйича эса унинг қиймати 12,8 миллион гривна деб кўрсатилган. Маблағ келиб чиқишини асослаш учун оила аъзоси уни якка тартибдаги тадбиркор сифатида юридик ва консалтинг хизматлари кўрсатиб топганини билдирган.
Терговчилар бу хизматлар учун ҳақиқатан ҳам маблағлар тушганини аниқлаган, аммо улар “Укрзализниця” темирйўл компанияси маблағларини жиноий уюшган гуруҳ таркибида талон-торож қилганликда гумонланаётган шахсдан келган. Квартира харидига сарфланган қолган 8,8 миллион гривна маблағининг қонуний келиб чиқиши тасдиқланмаган, дея таъкидлади идора.
Январ ойида Украина президенти УХХ раҳбариятини алмаштирган. Мамлакат хавфсизлик хизмати раҳбари вазифасини вақтинча бажарувчи этиб Евгений Хмара тайинланган. Унгача бу лавозимни 2022 йил июлидан бери Василий Малюк эгаллаб келаётган эди.
Истеъфосини эълон қилар экан, Малюк УХХ тизимида қолишини ва “жаҳон даражасидаги асимметрик махсус операцияларни” амалга ошириш билан шуғулланишини билдирган.
