Трамп АҚШ Эронга ҳали жиддий зарба беришни бошламаганини айтди

АҚШ ҳали Эрон бўйлаб жиддий зарбалар беришни бошламади, деди Доналд Трамп CNN телеканалига телефон орқали берган интервюсида.

Президент америкалик ҳарбийлар Эронни «ахлатдан тозалаётгани», аммо зарбаларнинг «катта тўлқини» ҳали олдинда эканини айтган.

«Ўйлайманки, барчаси жуда яхши кетмоқда. Бу жуда кучли бўлди. Бизда дунёдаги энг кучли армия бор ва биз ундан фойдаланамиз», – деган Трамп CNN журналисти Жейк Тапперга.

АҚШ Эрон халқига режимни ағдаришда ёрдам бериш учун ҳарбий ҳаракатлардан ташқари яна қандайдир ҳаракатлар қилиняптими дея берилган саволга Трамп тасдиқ маъносида жавоб қайтарган, аммо бу билан нимани назарда тутганига аниқлик киритмаган. «Аммо ҳозир барча уйида қолишини хоҳлаймиз. Чунки кўча хавфсиз эмас», – деган у.

«Биз ҳали уларга жиддий зарба беришни бошлаганимиз ҳам йўқ. Катта тўлқин ҳали бошлангани йўқ. Катта тўлқин келмоқда», – дея қўшимча қилган АҚШ президенти.

Ҳозирча Трамп учун «энг катта сюрприз» Эроннинг минтақадаги араб мамлакатларига – Баҳрайн, Иордания, Кувайт, Қатар ва БААга ҳужум қилиши бўлган. «Биз ажабландик. Биз уларга „барчасини ҳал қилишимиз“ни айтдик, энди эса улар (Форс кўрфази давлатлари) жанг қилмоқчи».

New York Post учун интервюсида эса АҚШ раҳбари «агар зарурат туғилса», қуруқлик амалиёти ўтказиш учун Эронга Америка қўшини юборилишини истисно қилмаслигини айтган.

«Бошқа исталган президент Эрон ҳудудига қуруқлик қўшинлари кирмаслигини айтган бўларди. Мен эса бундай демайман», – деган Трамп.

АҚШ ва Исроил 28 феврал куни Эрондаги ҳарбий объектларни ўққа тутди, шунингдек, мамлакат раҳбариятининг муҳим вакилларини, жумладан, диний раҳнамо Али Хоминаийни ўлдирди. Бунга жавобан Теҳрондагилар ракета ва дронлар билан Исроилдаги объектларга ҳамда АҚШнинг минтақадаги базаларига зарбалар бермоқда.