Трамп Эроннинг янги раҳбарини шахсан ўзи сайлашни истамоқда

АҚШ президенти Доналд Трамп Эроннинг навбатдаги олий раҳбари сайловида шахсан иштирок этиш истагини билдирди. Бу ҳақда у Axios’га берган интервьюсида айтиб ўтди.

«Бекорга вақт сарфлашяпти. Хоминаийнинг ўғли ҳеч ким эмас. Мен Венесуэладаги Делси [Родригес] билан бўлгани каби тайинловда иштирок этишим керак», деди у.

Трампнинг тушунтиришича, у ўтмишдошининг сиёсатини давом эттирадиган бундай раҳбар тайинланишини истамайди, шу сабабли АҚШ «беш йилдан кейин» яна урушга киришиши мумкин. Республикачининг қўшимча қилишича, у «Эронга уйғунлик ва тинчлик олиб келадиган» одам раҳбар бўлишини хоҳлайди, Хоминаийнинг ўғли эса қабул қилинмайди.

Эрон олий раҳбари Али Хоминаий 28 февраль куни Исроил авиазарбаси оқибатида ҳалок бўлди. Унинг ўрнига ўғли 56 ёшли Мўжтаба Хоминаий асосий даъвогарга айланди.

Али Хоминаийнинг ўзи ворис тайинламаган, бу масалани Экспертлар кенгаши кўриб чиқади.

Мўжтаба Хоминаийдан ташқари, олий раҳбар лавозимига Эрон парламенти спикери Али Ларижонийнинг укаси Содиқ Ларижоний, Эрон Ислом Республикаси асосчисининг набираси Ҳасан Ҳумайний, шунингдек, Эроннинг еттинчи президенти Ҳасан Руҳоний даъвогарлик қилмоқда. Бундан ташқари, режим қулаган тақдирда, Эроннинг сўнгги шоҳининг тўнғич ўғли Ризо Паҳлавий ҳокимият тепасига келиши мумкин.