Украинага 90 млрд евро: Германия Венгрияга босимни кучайтирмоқда

Германия ташқи ишлар вазири Йоханн Вадефул Венгрияни Европа иттифоқининг Украина учун мўлжалланган кредити блокланишини тўхтатишга чақирди. “Биз энди қабул қилиб бўлмайдиган тўсиқлар — ҳозир Венгриядан келаётганига ўхшаш блокировкалар жуда зарур ёрдамни кечиктириб, шу тариқа мамлакат мудофааси учун маблағ етишмаслиги сабаб инсонлар ҳаётига қимматга тушишига йўл қўя олмаймиз”, — деди Вадефул 4 март, чоршанба куни Варшавада Болтиқ денгизи давлатлари кенгашининг норасмий учрашувида.

Гап 90 млрд евро миқдоридаги қарз ҳақида кетмоқда. Шундан 60 млрд евро тўғридан тўғри Украина мудофаа эҳтиёжлари учун мўлжалланган. Германия ТИВ раҳбарининг сўзларига кўра, бу кредитга нафақат Киевнинг мудофаа қобилияти, балки Европадаги тинчлик ҳам боғлиқ.

Венгрия ўз ветосини шу билан изоҳлайдики, Украина ҳудуди орқали ўтувчи “Дружба” нефт қувурига Россия зарба берганидан кейин, Киев гўё таъмирлаш ишларини амалга оширмагани сабаб, Будапешт энди Россия нефтини ололмаяпти. Украина президенти Володимир Зеленский ўтган ҳафта Венгрия танқидларига жавобан Россия нефтининг Европа бозорида ўрни йўқлигини айтган.

Йоханн Вадефул Украинанинг Евроиттифоққа аъзо бўлиш истиқболи ҳақида ҳам гапириб, Европа давлатларини Киевни бу йўлда қўллаб-қувватлашга чақирди. Унинг тушунтиришича, ЕИ аъзолиги эҳтимол “Украина учун энг муҳим хавфсизлик кафолати” бўлиши мумкин.

Шу билан бирга, у Украина “белгиланган кетма-кетликка” амал қилиши ва 1993 йилда қабул қилинган, ЕИга аъзоликка номзодлар учун асосий талаблар бўлган “Копенҳаген мезонлари”ни бажариши кераклигини таъкидлади. “Биз имкони борича тезроқ аъзоликни хоҳлаймиз”, — дея қўшимча қилди Германия ташқи сиёсат идораси раҳбари. У Германия ҳукумати Украинани ислоҳотларни тезлаштиришга чақиришини ва ЕИ доирасида Украина аъзолигига нисбатан очиқлик сақланишини таъминлашга интилишини билдирди.

Владимир Зеленский феврал ойида Мюнхен хавфсизлик конференциясида сўзлаганда, Украина 2027 йилдаёқ Евроиттифоқ аъзоси бўлиш ниятини яна бир бор қайд этган эди. Германия канцлери Фридрих Мерц эса бундай имкониятни кўрмаётганини аввалроқ билдирган. Германия ҳукумати раҳбари: “2027 йил 1 январдан аъзолик истисно қилинади”, — деган.