Нефт нархи рекорд даражада ошди

Нефт нархида 2022 йилдан бери энг катта ҳафталик ўсиш қайд этилди, деб хабар берди Bloomberg. Бир ҳафта ичида Brent русумидаги нефт 17–20 фоизга қимматлади, 6 март куни фючерслар 2024 йил июл ойидан бери биринчи марта бир баррели 87 доллардан ошди. West Texas Intermediate (WTI) русумидаги нефтнинг бир баррели нархи 84 долларни ташкил этди. Дизел ёнилғиси учун Европа фючерслари бир ҳафтада қарийб 50 фоизга кўтарилди. Дизелни қайта ишлаш маржаси уч йиллик максимум — бир баррели 49 долларга етди, авиакеросин маржаси эса 55 долларни ташкил қилди.

Goldman Sachs таҳлилчилари агар етказиб беришдаги узилишлар сақланиб қолса, Brent нефтининг бир баррели нархи 100 доллардан ошиши мумкинлиги ҳақида огоҳлантиришмоқда. Банкнинг хомашёлар бўйича глобал тадқиқотлар бўлими раҳбари Саманта Дарт бу сценарий эҳтимоли борлигини тасдиқлади. Goldman Sachs’нинг тезкор ҳисоботига кўра, бу Ҳўрмуз бўғози қамали беш ҳафтадан ортиқ давом этганда юз беради.

Қатар энергетика вазири Саад ал-Кааби агар ҳарбий ҳаракатлар давом этадиган бўлса, Форс кўрфазидаги барча мамлакатлар бир неча кун ичида ишлаб чиқаришни тўхтатишга мажбур бўлади. Бу ҳолда нефт нархи 150 долларга, газ нархи эса 1 млн BTU учун 40 долларгача кўтарилиши мумкин, бу ҳарбий ҳаракатлардан олдинги даражадан тўрт баробар юқори дегани. QatarEnergy суюлтирилган газ етказиб бериш бўйича форс-мажор эълон қилди ва Ras Laffan комплексига Эрон дрони ҳужумидан сўнг 9 минг ходимни эвакуация қилди.

Ҳўрмуз бўғози орқали тижорат кемалари қатнови деярли тўлиқ тўхтаган. Бирлашган денгиз ахборот маркази (JMIC) маълумотларига кўра, кемалар сигналлари таҳлили охирги 24 соат ичида нефт танкери бўлмаган атиги иккита юк кемаси ҳаракатланганини кўрсатган.

Халқаро энергетика агентлиги маълумотларига кўра, ўтган йили Ҳўрмуз бўғози орқали кунига 20 млн баррелга яқин нефт ва нефт маҳсулотлари ўтган, бу жаҳон бўйича етказиб бериш ҳажмининг тахминан бешдан бир қисмини ва жаҳон суюлтирилган газ экспортининг 30 фоизгача қисмини ташкил қилади.

Maersk, Hapag-Lloyd ва CMA CGM контейнер операторлари йўналишлар ўзгартирилганини эълон қилди.

АҚШ маъмурияти нархлар кескин ошиши муаммосини ҳал қилиш учун қатор вариантларни кўриб чиқмоқда. АҚШ ички ишлар вазири Дуг Бергам рўйхатдан фавқулодда ҳамда узоқ муддатли чоралар, жумладан стратегик нефт захирасидан фойдаланиш эҳтимоли ўрин олганини айтди. Бироқ Bloomberg маълумотларига кўра, Оқ уй ҳозирда 415 млн баррелга яқин нефт сақланаётган захирадан нефт ажратишни ҳозирча режалаштирмаяпти. Давлат котиби Марко Рубио эса энергетика харажатларини камайтириш дастурини эълон қилди, лекин тафсилотларни очиқламади.

АҚШ молия вазирлиги Ҳиндистонга Россия нефтини харид қилиш учун қисқа муддатли рухсат берди. Молия вазири Скотт Бессентнинг изоҳ беришича, рухсат «фақат денгиздан аллақачон олинган нефт бўйича келишувларга тегишли». Ҳиндистон нефтни қайта ишлаш корхоналари аллақачон 10 млн баррелдан ортиқ Россия нефтини сотиб олган.