Умра сафарлари қайта йўлга қўйилмоқда

Ўзбекистон Транспорт вазирлиги 10 мартдан бошлаб маҳаллий ва хорижий авиакомпанияларга Саудия Арабистони ва БАА билан икки томонлама авиақатновларни тиклашга рухсат берди.

Фото: Kun.uz

Транспорт вазирлиги Ўзбекистон ҳудудидан БАА ва Саудия Арабистонига икки томонлама йўловчи ташишни ташкил этишга 10 мартдан бошлаб рухсат берди. Бу ҳақда Ўзбекистонда фаолият юритувчи миллий ва хорижий авиакомпанияларга юборилган хатда айтилади. Kun.uz ушбу хат нусхаси билан танишиб чиқди.

Хатда таъкидланишича, Саудия Арабистонига амалга оширилаётган парвозларда, умра мавсуми ниҳоясига етаётганлиги ва «Ҳаж-2026» мавсумидан олдин барча «Умра» зиёратчилари Саудия Арабистонидан чиқиб кетиши шартлиги инобатга олиниши лозим.

Парвозларни ташкил этишда парвозлар хавфсизлиги талаблари, халқаро ҳаво ташувлари бўйича амалдаги қоидалар, шунингдек Саудия Арабистони ва БАА ваколатли органлари томонидан белгиланган талаб ва тартибларга қатъий риоя этилиши таъминланиши белгиланган.

Яқин Шарқда ҳаво ҳудуди ёпилгани сабабли Ўзбекистон мусулмонлари идораси ҳамда туроператорлар томонидан ташкил этилаётган умра сафарлари 1 март кунидан вақтинча кечиктирилган эди.

Тайёрлаган Сардор Юсупов

#Саудия Арабистони #авиақатнов #Умра

Эрон ядро дастури бўйича музокаралар расман тугамай туриб, 2026 йил 28 феврал куни АҚШ ва Исроил Эрон ҳудудига зарбалар бера бошлади. Президент Доналд Трамп ҳужумлардан мақсад Теҳрондаги режимни ағдариш эканини эълон қилди.