Трамп Эроннинг жаҳон чемпионатидаги иштироки ўринли эмаслигини айтди

АҚШ президенти Доналд Трамп футбол бўйича Эрон миллий жамоасининг жаҳон чемпионатидаги иштироки ўринли эмаслигини айтди.

«Эрон миллий жамоаси жаҳон чемпионатида мамнуният билан кутиб олинади, лекин мен ҳақиқатан ҳам уларнинг ҳаёти ва хавфсизлиги учун у ерда бўлишини ўринли деб ҳисобламайман», деб ёзди Трамп ижтимоий тармоқда.

Аввалроқ, Эрон спорт вазири Аҳмад Дунёмоли хавфсизлик масалалари ва АҚШ билан уруш сабабли миллий жамоанинг жаҳон чемпионатидаги иштироки имконсиз эканини айтган эди.

«Бу коррупциялашган ҳукумат раҳбаримизни ўлдирганидан сўнг, жаҳон чемпионатида иштирок этишимизга имкон берадиган ҳеч қандай шароит қолмади. Эронга қарши олиб борилган душманлик ҳаракатлари фонида бизга қарши икки марта уруш олиб борилди ва бир неча минг фуқаромиз ўлдирилди. Бундай шароитда бизда иштирок этиш имконияти йўқ», деди у.

Ҳозирча бу ҳақда расмий қарор қабул қилинмаган. Эрон футбол федерацияси ва ФИФА бу хабар юзасидан изоҳ бермади.

Жаҳон чемпионати 11 июндан 19 июлга қадар АҚШ, Канада ва Мексикада бўлиб ўтади. Эрон миллий жамоаси Осиё саралаши учинчи босқичида Ўзбекистон билан бир гуруҳда қатнашган ва биринчи ўрин билан мундиал йўлланмасини қўлга киритганди. Қуръа натижаларига кўра Эронга G гуруҳида Белгия, Миср ва Янги Зеландия жамоалар рақиб бўлганди. Эронликларнинг гуруҳ босқичидаги барча ўйинлари АҚШда, икки ўйин Лос-Анжелесда, яна биттаси – Сиэтлда бўлиб ўтиши белгиланган.