АҚШ Эрон нефтига қарши санкцияларнинг бир қисмини тўхтатди

АҚШ президенти Доналд Трамп маъмурияти Эрон нефтига қарши санкцияларни 30 кунга юмшатди ва агар у денгизда бўлса, уни сотиб олишга рухсат берди. Бу ҳақда АҚШ молия вазири Скотт Бессент 20 март, жума куни X ижтимоий тармоғида маълум қилди.

Вазирнинг сўзларига кўра, ҳозирда санкция остидаги Эрон нефтини Хитой арзон нархларда сотиб олмоқда. Вашингтон бу чора орқали жаҳон бозори учун тахминан 140 миллион баррель нефтни очишни режалаштирмоқда, бу эса “жаҳон энергетикаси ҳажмини оширади ва Эрон келтириб чиқарган таъминотдаги вақтинчалик босимни юмшатишга ёрдам беради”.

“Аслида, биз ‘Эпик ғазаб’ операцияси давом этаётган пайтда нархларни паст даражада ушлаб туриш учун Эрон баррелларидан Теҳроннинг ўзига қарши фойдаланамиз”, — дея изоҳ берди Бессент.

Бундан олдин АҚШ худди шундай чораларни Россия нефти ва нефт маҳсулотларига нисбатан ҳам қўллаган эди.

Эрон Нефт вазирлиги вакили АҚШнинг баёнотига жавобан X тармоғида мамлакатда “денгизда ҳам, халқаро бозорларни таъминлаш учун ҳам” захиралар йўқлигини ёзди. Унинг айтишича, Вашингтон эълон қилган чоралар фақатгина “харидорларга умид уйғотиш” учун қаратилган.

20 март куни Дональд Трамп Truth Social тармоғида Ҳўрмуз бўғози “ундан фойдаланадиган бошқа давлатлар томонидан, зарурат туғилса, қўриқланиши ва назорат қилиниши керак”, деб ёзди.

“Агар биздан сўрашса, бу давлатларнинг Ҳўрмуз бўйича саъй-ҳаракатларига ёрдам берамиз, аммо Эрондан келаётган таҳдид бартараф этилганидан кейин бунинг зарурати бўлмаслиги керак. Энг муҳими, улар учун бу енгил ҳарбий операция бўлади”, — деб давом этди сиёсатчи.

Бундан бир неча соат олдин эса у АҚШсиз НАТОни “қоғоздаги йўлбарс” деб атаган ва алянсдаги иттифоқчиларини “қўрқоқлар” деб таърифлаган эди. Унинг айтишича, улар “тўлашга мажбур бўлаётган юқори нефт нархларидан шикоят қилади, аммо Ҳўрмуз бўғозини очишга ёрдам беришни истамайди”, гарчи бунинг “хатари паст” бўлса ҳам.

АҚШ ва Исроилнинг Эрон билан уруши бошланганидан буён, жаҳонда ташилаётган нефт ва суюлтирилган табиий газнинг тахминан 20 фоизи ўтадиган Ҳўрмуз бўғози амалда Эрон ҳарбийлари томонидан тўсиб қўйилган. Эрон шунингдек, Форс кўрфази минтақасидаги бир қатор мамлакатларнинг нефт объектлари ва нефт танкерларига ҳам зарба бермоқда. Бу эса жаҳонда энергия ташувчилар нархининг кескин ўсишига олиб келди.

https://www.dw.com/ru/administracia-trampa-priostanovila-cast-sankcij-protiv-iranskoj-nefti/a-76462443