Трамп Шавкат Мирзиёевни Тинчлик кенгаши йиғилишига таклиф қилди

АҚШ президенти Доналд Трамп Ўзбекистон президенти Шавкат Мирзиёевни Тинчлик кенгашининг навбатдаги йиғилиши ва Маямида ўтадиган G20 саммитига таклиф этди.

Фото: Reuters

Ўзбекистон президенти Шавкат Мирзиёев номига Америка Қўшма Штатлари президенти Доналд Трампдан мактуб келди, дея хабар қилди президент матбуот хизмати.

Америка етакчиси ўз мактубида Ўзбекистон раҳбарининг 2026 йил феврал ойида бўлиб ўтган Тинчлик кенгашининг илк йиғилишидаги иштирокини юксак баҳолади.

Мактубда Шавкат Мирзиёев Ўзбекистонда улкан натижаларга эришаётгани таъкидланиб, мамлакатга ташриф билан келиш таклифи учун миннатдорлик билдирилган.

Ўз навбатида, президент Доналд Трамп давлат раҳбарини Тинчлик кенгашининг навбатдаги йиғилишига, шунингдек, Маямида ўтадиган G20 саммитига таклиф этди.

«Яратган Сизни ва Ўзбекистоннинг буюк халқини ёрлақасин», дейилади мактубда.

Маълумот учун, Тинчлик кенгашининг навбатдаги йиғилиши 2027 йил бошида ўтказилиши режалаштирилган. G20 саммити эса 2026 йил декабрида бўлиб ўтиши кутилмоқда.