Cobalt ва Damas сотуви пасайди, Yuan Up’га талаб кескин ошган. Ўзбекистон автомобил бозори шарҳи

Ўнлаб йиллар давомида Ўзбекистон автомобиль бозори сокин ва «ёпиқ макон»ни эслатарди. Аммо, охирги вақтларда вазият қисман бўлсада ижобий томонга ўзгарди. Автосалонлардаги узундан-узоқ навбатлар ва танловсизлик ўрнига харидорлар футуристик дизайндаги электромобиллар, гибридлар ва хориждан импорт қилиб олиб келинаётган кроссоверларни сотиб олишни афзал кўришяпти.

«Ўзавтосаноат» тақдим қилган маълумотларга кўра, 2026 йилнинг январ-феврал ойларида мамлакатдаги расмий дилерлар томонидан 57 минг 512 дона автомобил сотилган. Бу ўтган йилнинг мос даврига нисбатан 14,1 фоиз ёки 7 минг 139 донага кўп. Энг катта ўсиш электромобиллар сегментига тегишли моделлар билан юз беряпти.

Жорий йилнинг дастлабки икки ойи давомида UzAuto Motors томонидан тақдим этилган 10 та моделдан тўрттасининг сотуви ошган, олтитасига талаб сезиларли даражада қисқарган. Хусусан, Tracker, Onix, Labo вa Tahoe сотувида ўсиш кузатилган бўлса, қиммат сегментдаги машиналар: Malibu, Captiva, Equinox, Traverse’га талаб тушиб кетган. Шунингдек, миллий компания томонидан энг кўп сотиладиган моделлар – Cobalt ва Damas сотуви ҳам қисқарган. Умуман олганда, ҳисобот даврида UzAuto Motors ʼнинг бозордаги улуши ўтган йилнинг мос даврига нисбатан 82,4 фоиздан 79,3 фоизгача қисқарган.

Chevrolet брендига тегишли бўлмаган ва энг кўп сотилган автомобил –. Kia Sonet . Ўз навбатида, Kiaʼнинг қиммат моделларига талаб сезиларли даражада пасайгани қайд этилган.

2026 йилнинг икки ойида UzAuto Motors томонидан ишлаб чиқарилмаган энг кўп сотилган моделлар

Kia, Cherry ва Haval автомобилларини етказиб берувчи ADM Jizzakhʼнинг Ўзбекистон бозоридаги улуши 11,4 фоиздан 12,5 фоизга, умумий сотувлар ҳажми эса 5 минг 762 донадан 7 минг 202 донагача кўпайган. BYD ҳам бозордаги улушини 5,7 фоиздан 8 фоизгача, сотувлар ҳажмини 2 минг 862 донадан 4 минг 621 донагача оширган.